ក្រុមអារ៉ាប់-អ៊ិស្លាមបានដាក់ទៅអង្គការសហប្រជាជាតិនូវសេចក្តីព្រាងដំណោះស្រាយមួយនិងអំពាវនាវឱ្យមានបទឈប់បាញ់ពេញលេញនៅហ្គាហ្សា

យោងតាមកាសែត The Times of Israelបានផ្សាយថា វាត្រូវបានគេរំពឹងថា នៅថ្ងៃទី ៨ខែធ្នូ សេចក្តីព្រាងសេចក្តីសម្រេចដែលព្រាងដោយបណ្តាប្រទេសអារ៉ាប់-មូស្លីមដែលអំពាវនាវឱ្យមានបទឈប់បាញ់ពេញលេញនៅតំបន់ហ្គាហ្សាស្ទ្រីបនឹងត្រូវដាក់ជូននៅក្នុងសម័យប្រជុំដែលធ្វើឡើងនៅថ្ងៃតែមួយនៃក្រុមប្រឹក្សាសន្តិសុខអង្គការសហប្រជាជាតិ។
ក្នុងអំឡុងកិច្ចប្រជុំខាងលើ ក្រុមប្រឹក្សាសន្តិសុខអង្គការសហប្រជាជាតិ (UNSC) ក៏នឹងពិចារណាលើសារដែលផ្តល់ដោយអគ្គលេខាធិការអង្គការសហប្រជាជាតិ លោក Antonio Guterres ផងដែរ។ កន្លងមកក្នុងលិខិតផ្ញើជូនក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃទី៦ ខែធ្នូ អគ្គលេខាធិការ Guterres បានលើកយកមាត្រា ៩៩ នៃធម្មនុញ្ញអង្គការសហប្រជាជាតិ ដែលអនុញ្ញាតឱ្យលោកនាំយកមកពិភាក្សាពីក្រុមប្រឹក្សាសន្តិសុខអង្គការសហប្រជាជាតិ រាល់បញ្ហាដែលលោកចាត់ទុកថាជាការគំរាមកំហែងដល់សន្តិភាពនិងអន្តរជាតិ។
យោងតាមប្រភពខាងលើ ប៉ាឡេស្ទីននិងក្រុមអារ៉ាប់-អ៊ិស្លាម នៅអង្គការសហប្រជាជាតិ សង្ឃឹមថា សាររបស់អគ្គលេខាធិការអង្គការសហប្រជាជាតិនឹងលើកទឹកចិត្តឱ្យអាមេរិកធ្វើសកម្មភាពជំនួសឱ្យការប្រើវេតូ។ សេចក្តីព្រាងសេចក្តីសម្រេចមួយទៀតដែលព្រាងដោយអេហ្ស៊ីបស្តីពីស្ថានការណ៍នៅហ្គាហ្សាកំពុងស្ថិតក្រោមការចរចា។ សេចក្តីព្រាងសេចក្តីសម្រេចនេះត្រូវបានគេរំពឹងថានឹងត្រូវដាក់ឱ្យបោះឆ្នោតនៅសប្តាហ៍ក្រោយ។
មុននេះ កាលពីថ្ងៃទី១៥ ខែវិច្ឆិកា ក្រុមប្រឹក្សាសន្តិសុខអង្គការសហប្រជាជាតិបានអនុម័តសេចក្តីសម្រេចមួយដោយអំពាវនាវឱ្យមានការពន្យារពេលបទឈប់បាញ់មនុស្សធម៌នៅតំបន់ហ្គាហ្សាស្ទ្រីប។ មកដល់ថ្ងៃទី 22 ខែវិច្ឆិកា បទឈប់បាញ់បណ្តោះអាសន្នត្រូវបានធានានៅហ្គាហ្សា ដោយសារកិច្ចខិតខំប្រឹងប្រែងសម្របសម្រួលដោយអេហ្ស៊ីប កាតារនិងសហរដ្ឋអាមេរិក។
បទឈប់បាញ់ត្រូវបានបញ្ចប់ ហើយការប្រយុទ្ធគ្នានៅក្នុងតំបន់ Khan Younis នៅភាគខាងត្បូង Gaza បានក្លាយជាកាចសាហាវ។ អាជ្ញាធរសុខាភិបាលប៉ាឡេស្ទីនបាននិយាយថា ការវាយប្រហារចុងក្រោយរបស់កងទ័ពអុីស្រាអែលលើតំបន់ហ្គាហ្សាស្ទ្រីបកាលពីថ្ងៃទី 7 ខែធ្នូ បានបណ្តាលឱ្យមនុស្សជាង 350នាក់ស្លាប់ និងប្រហែល 1,000 នាក់រងរបួស ដែលភាគច្រើនជាជនស៊ីវិល។ ចំនួនអ្នកស្លាប់និងរបួសសរុបនៅហ្គាហ្សា ចាប់តាំងពីការចាប់ផ្តើមនៃការវាយប្រហារគ្រប់បែបយ៉ាងរបស់កងទ័ពអុីស្រាអែលលើតំបន់ហ្គាហ្សា ចាប់ពីថ្ងៃទី 7 ខែតុលា រហូតមកដល់ពេលនេះ បានកើនដល់ជាង 63,000 នាក់ ដែលក្នុងនោះមនុស្សជាង 17,100 នាក់បានស្លាប់ ប្រហែល 70% ជាកុមារ និងស្ត្រី៕ ដោយ៖ ធីរីណា

រូប​ថត​៖ UN NEWS