សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កញ្ញា អ៉ឹម រចនា អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានថ្លែងឱ្យដឹងនៅថ្ងៃទី១១ ខែធ្នូ ឆ្នាំ ២០២៣នេះថា៖ ក្រសួងកសិកម្ម សូមបដិសេធច្រានចោលនូវការចុះផ្សាយព័ត៌មានមិនពិតថា រាជរដ្ឋាភិបាលកំពុងឈូសឆាយតំបន់អភិរក្សដីព្រៃភ្នំតាម៉ៅបន្ថែមទៀត យកទៅវិនិយោគឱ្យឯកជន។
អ្នកនាំពាក្យរូបនេះ បានថ្លែងបញ្ជាក់ថា ផ្លូវដែលអាជ្ញាធរកំពុងឈូសឆាយ គឺស្ថិតនៅព្រំប្រទល់រវាងឧទ្យានអភិរក្សភ្នំតាម៉ៅ និងដីឯកជន មិនមែនស្ថិតនៅក្នុងដីអភិរក្សនោះទេ។ ម្យ៉ាងទៀត ការឈូសឆាយនេះ ធ្វើឡើងដើម្បីបង្ការភ្លើងឆេះព្រៃ ដែលធ្លាប់កើតមានកន្លងមកជារៀងរាល់ឆ្នាំ។ ហើយថា ការឈូសឆាយនេះ មិនត្រឹមតែអាចបង្ការការឆេះព្រៃ តែវាក៏អាចផ្ដល់មធ្យោបាយមួយទៀតដល់ប្រជាពលរដ្ឋមានផ្លូវធ្វើដំណើរ។
កញ្ញា អ៉ឹម រចនា បានគូសបញ្ជាក់យ៉ាងដូច្នេះថា៖«ខ្ញុំមិនយល់ថា ហេតុអ្វីបានជាអង្គការ Wildlife Alliance លោកផ្ដល់បទសម្ភាសន៍ទៅដល់សារព័ត៌មានមួយ ដែលផ្សាយពីក្រៅប្រទេស ចោទប្រកាន់រាជរដ្ឋាភិបាលកម្ពុជា ចោទប្រកាន់ក្រសួង ចោទប្រកាន់ឧទ្យាជាតិនេះថា យើងឈូសឆាយដីនេះ ដើម្បីផលប្រយោជន៍ផ្ទាល់ខ្លួន ឬដើម្បីអភិវឌ្ឍគម្រោងណាមួយ ដែលរំលោភបំពាន បំផ្លិចបំផ្លាញធនធានដែលយើងប្រឹងប្រែងការពារ ដែលអ្វីលើកឡើងគឺជាការប្រឌិតឡើងទាំងស្រុង»។
ដោយឡែកប្រធានសួនសត្វព្រៃការពារ និងសួនភូតគាម ភ្នំតាម៉ៅ លោក ញឹក រតនៈពេជ្រ បានមានប្រសាសន៍ថា ផ្លូវដែលអាជ្ញាធរឈូសឆាយ ចម្ងាយប្រមាណជាង ១គីឡូម៉ែត្រ ទទឹង ១០ម៉ែត្រនៅលើផ្លូវភ្លេីងចាស់ ដើម្បីឱ្យប្រជាពលរដ្ឋធ្វើដំណើរ និងការពារសួនដែលអាជ្ញាធរបានធ្វើរបងព័ទ្ធជុំវិញហើយ ដែលជាវិធានការការពារជីវិតសត្វពីភ្លើងឆេះផង។
លោកប្រធានសួនសត្វរូបនេះ បានឱ្យដឹងទៀតថា ផ្លូវភ្លេីងចាស់មានចម្ងាយប្រមាណ ២០ គីឡូម៉ែត្រព័ទ្ធជុំវិញឧទ្យានភ្នំតាម៉ៅ ហើយអាជ្ញាធរជួយសម្រួលជួសជុលត្រង់កន្លែងណាដែលពិបាកធ្វើដំណើរ។ លោកបន្តថា អាជ្ញាធរឈូសផ្លូវភ្លើងជាការងារបច្ចេកទេសការពារអាយុជីវិតសត្វ មិនមានផ្ដល់ការវិនិយោគផ្ដល់ផលប្រយោជន៍ឯកជននោះទេដូចការផ្សព្វផ្សាយទេ។
សូមជម្រាបជូនថា ឧទ្យានសួនសត្វ ព្រៃការពារ និងសួនភូតគាម «ភ្នំតាម៉ៅ» មានផ្ទៃដីទំហំសរុប ២ ០២៥ ហិកតា ស្ថិតនៅក្នុងភូមិសាស្ត្រ ស្រុកបាទី ខេត្តតាកែវ ដែលត្រូវបានបែងចែកជា ៣តំបន់ ដោយ ទី១ ជាតំបន់ព្រៃការពារសម្រាប់ស្ដារលទ្ធភាពសត្វព្រៃ មានផ្ទៃដីទំហំ ១០២១ហិកតា។
ទី២ តំបន់សួនភូតគាមឈើប្រណិតភ្នំតាម៉ៅ ជាតំបន់សម្រាប់ធានាថែរក្សាកូនឈើ និងអភិវឌ្ឍជាសួន ភូតគាម មានពូជឈើប្រណិត និងសោភ័ណភាព ដែលមានផ្ទៃដីទំហំ ៥៣០ហិកតា និងទី៣ តំបន់ឧទ្យានសួនសត្វភ្នំតាម៉ៅជាតំបន់សម្រាប់ថែរក្សាសត្វព្រៃ ព្យាបាល សង្គ្រោះសត្វព្រៃ អប់រំផ្សព្វ ផ្សាយ និងបម្រើសេវាទេសចរណ៍ ដែលមានផ្ទៃដីទំហំ ៤៧៤ហិកតា៕
ដោយ៖ សហការី
