សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យចំនួន ៧៩នាក់ ត្រូវបានកម្លាំងសមត្ថកិច្ចជំនាញ ចុះស្រាវជ្រាវ និងឃាត់ខ្លួនលើមុខសញ្ញាព្រហ្មទណ្ឌទូទៅចំនួន៥៧ករណី ក្នុងរយៈពេលមួយសប្តាហ៍គិតចាប់ពីថ្ងៃទី១០ រហូតដល់ថ្ងៃទី១៦ ខែធ្នូ ឆ្នាំ២០២៣។ នេះបើយោងតាមការឱ្យដឹងពីបណ្ឌិតទូច សុឃៈ (សុខៈ) អ្នកនាំពាក្យរងក្រសួងមហាផ្ទៃ។
អ្នកនាំពាក្យរងក្រសួងមហាផ្ទៃរូបនេះ បានថ្លែងឱ្យដឹងកាលពីថ្ងៃទី១៩ ខែធ្នូម្សិលមិញនេះថា ក្នុងចំណោមបទល្មើសព្រហ្មទណ្ឌទាំង៥៧ករណី មានករណីលួចចំនួន ២៨ករណី អំពើហិង្សា១៩ករណី លួច(ឆក់)មាន ៤ករណី ឆបោក២ករណី និងក្រៅពីនេះ ករណីលួចមានស្ថានទម្ងន់ទោស(ប្លន់) ឃាតកម្ម មនុស្សឃាតដោយអចេតនា រំលោភសេពសន្ថវៈ មានតែមួយករណីប៉ុណ្ណោះ ដែលបានកើតឡើងនៅទូទាំងប្រទេស។
ក្រសួងមហាផ្ទៃបានចាត់វិធានការយ៉ាងយកចិត្តទុកដាក់បំផុត ពិសេសស្របតាមអនុសាសន៍ដ៏ខ្ពង់ខ្ពស់របស់ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដែលបានដាក់ទិសដៅអាទិភាពយ៉ាងម៉ឺងម៉ាត់និងប្រកបដោយទទួលខុសត្រូវដើម្បីធានាបាននូវសន្តិសុខនិងសណ្ដាប់ធ្នាប់ តាមទស្សនៈ អ្វីៗធ្វើដើម្បីភាពកក់ក្ដៅជូនប្រជាពលរដ្ឋ។
លទ្ធផលរយៈពេលមួយសប្តាហ៍នេះគឺជាការខិតខំប្រឹងប្រែងយ៉ាងក្លៀវខ្លានិងប្រកបដោយការទទួលខុសត្រូវស្របតាមនីតិវិធីដែលបានកំណត់ដោយច្បាប់របស់ អគ្គស្នងការនគរបាលជាតិ បណ្ដាស្នងការដ្ឋាននគរបាលរាជធានីខេត្តនិងអធិការដ្ឋានក៏ដូចជាប៉ុស្តិ៍នគរបាលទូទាំងប្រទេស។
អ្នករាំពាក្យដដែលនេះក៏បានបន្តទៀតថា សមត្ថកិច្ចនៅតាមបណ្ដារាជធានីគ្រប់ខេត្តក្រុងទាំងអស់ បាននិងកំពុងបន្តយកចិត្តទុកដាក់យ៉ាងខ្លាំងក្លា ដើម្បីបង្ការ និងបង្ក្រសបបទល្មើសទាំងឡាយ ជាពិសេសនៅក្នុងបទល្មើសដែលពាក់ព័ន្ធទិដៅអាទិភាពទាំង៦ ដែល ឯកឧត្តមអភិសន្តិបណ្ឌិតឧបនាយករដ្ឋមន្ត្រី បានដាក់ចេញ និងតែងក្រើនរម្លឹកជារឿយៗដល់ស្ថាប័នពាក់ព័ន្ធក្រោមឱវាទក្រសួងមហាផ្ទៃ៕
ដោយ៖ សហការី
