សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បញ្ហាផិតក្បត់ ជាអំពើមួយដែលសង្គម មិនអាចទទួលយកបាន ខណៈប្រទេសយើងអនុញ្ញាតអោយ មាន ប្តីមួយ ប្រពន្ធមួយ ។ ប៉ុន្តែបុគ្គល ខ្លះបានងប់ងល់ ភ្លើងស្នេហ៍ ភ្លេចអស់សីលធម៌របស់ខ្លួន ធ្វើឱ្យរង្វង់គ្រួសារប្រេះស្រាំ បាត់បង់ទំនុកចិត្តគ្នា ក្លាយជាអំពើ ផិត ក្បត់ ខុសពីប្រពៃណីជាតិដ៏ផូផង់របស់យើង។
ជាក់ស្តែងលោកប្តីកំហូចរឿងលួចមានកំណាន់ចិត្តថ្មី ត្រូវបានប្រពន្ធដឹង បានតាមទាន់ជាន់កែង ដោយសារតែបានប្រព្រឹត្តនូវរឿងច្រំដែលៗជាន់ដានចាស់មិនឈប់ ព្រោះតែលួចលាក់មានស្រី ក្បត់ចិត្តប្រពន្ធរបស់ខ្លួនម្ដងហើយម្ដងទៀត មិនព្រមកែទាល់តែសោះ ទើបធ្វើឲ្យប្រពន្ធអស់ទំនុកចិត្ត ក៏បានតាមដានគាត់ជាប់រហូតមកសៅគ្រីទីណាក៏ដឹង ។ នេះជាមូលហេតុ បង្កើតវិប្បដិសារី ក្នុងគ្រួសារ ចាំពេញមួយជីវិត។
ក្បត់នៅតែក្បត់ ! ដោយឡែកចុងក្រោយនេះ ប្តីបានប្រាប់មកប្រពន្ធថា ទៅបើករថយន្តឲ្យគេនៅឯខេត្តកំពតដើម្បីរកប្រាក់ផ្គត់ផ្គង់គ្រួសារ ។ ប៉ុន្តែក្រោយចេញផុតពីផ្ទះ មានទៅខេត្តកំពតឯណា បែរជាមកដេកជាមួយស្រីស្នេហ៍នៅក្នុងបន្ទប់ជួលទៅវិញ ហើយក៏ត្រូវប្រពន្ធតាមទាន់ផ្អើលឈុល ដល់អ្នកជិតខាង ហើយចងជាកំហឹងដល់ភរិយា ចំពោះទង្វើពុតត្បុតអាក្រក់ខ្លួនឯងសោះ ។
សូមបញ្ជាក់ថា ៖ ហេតុការណ៍នេះបានកើតឡើង កាលពីវេលាម៉ោង៤ និង៣០នាទីរសៀល ថ្ងៃទី១៩ ខែធ្នូ ឆ្នាំ២០២៣ ម្សិលមុិញ នៅចំណុចបន្ទប់ជួលមួយកន្លែង ស្ថិតនៅតាមផ្លូវបេតុង ក្នុងភូមិត្រពាំងពោធិ៍ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
ប្ដីប្រពន្ធនេះពុំត្រូវបាន ស្គាល់អត្តសញ្ញាណនោះទេ គ្រាន់តែដឹងថា ពួកគាត់រស់នៅឯស្រុកកោះធំ ខេត្តកណ្ដាល ។ ពេលកើតរឿងក្រោយពេលអាជ្ញាធរភូមិ និងប្រជាការពារភូមិចុះទៅធ្វើការសម្របសម្រួល និងការពារមិនឲ្យកើតមានអំពើហិង្សារួចមកពួកគាត់ទាំង២នាក់ រួមទាំងស្រីស្នេហ៍របស់ប្ដី បាននាំគ្នាចាកចេញបាត់អស់ទៅ ។
តាមប្រភពពីកន្លែងនោះបានប្រាប់ឲ្យដឹងថា ៖ បុរសជាប្ដីរូបនោះបានលួចលាក់មានស្នេហាជាមួយស្រីក្រៅក្បត់ចិត្តប្រពន្ធរបស់ខ្លួន ហើយកន្លងមកបានលួចមកជួបរួមរ័កមេត្រីជាមួយស្រីម្នាក់នោះក្នុងបន្ទប់ជួលខាងលើនេះ និងធ្លាប់ត្រូវបានប្រពន្ធតាមទាន់នៅកន្លែងដដែលបង្កឲ្យមានការភ្ញាក់ផ្អើលម្ដងរួចមកហើយ ។
បន្ទាប់មកក៏ស្ងាត់មួយរយៈ តែប្រពន្ធបានអស់ទំនុកចិត្តលើប្តីកំហូចនេះទៀតហើយ ម្យ៉ាងទៀតបានធ្វើឲ្យជីវិតប្តី-ប្រពន្ធ រស់នៅមិនសូវចុះសម្រុងនឹងគ្នាដូចមុនទៀតឡើយ ព្រោះតែលោកប្តីនេះមិនព្រមកែខ្លួន នៅតែប្រព្រឹត្តរឿងចាស់ដដែលៗទៀត ។ ប្រភពដដែលបានប្រាប់ឲ្យដឹងបន្តទៀតថា ៖ លុះដល់ថ្ងៃកើតហេតុ បុរសនេះបានប្រាប់ប្រពន្ធថា ទៅបើករថយន្តឲ្យគេនៅឯខេត្តកំពត រួចក៏ជិះម៉ូតូ១គ្រឿងចាកចេញពីផ្ទះបាត់ទៅ ។ ប៉ុន្តែក្រោយចេញផុតពីផ្ទះគាត់អត់បានទៅខេត្តកំពតនោះទេ បែរជាមកណាត់ជួបស្រីស្នេហ៍នៅក្នុងបន្ទប់ជួលខាងលើទៀត ។ ចំណែកឯប្រពន្ធមិនទុកចិត្តទេ ក៏បានតាមដានជាប់រហូតដូចស្រមោលអន្ទោលតាមប្រាណ ។ ខណៈគាត់កំពុងត្រេកត្រអាលជាមួយស្រីស្នេហ៍ជក់ចិត្តដិតអារម្មណ៍ក្នុងបន្ទប់ ស្រាប់តែប្រពន្ធទៅទាន់ ភ្នែកនៅកញ្ជឹង ក តែម្តង ។ លើកនេះខុសពីលើកមុនដោយប្រពន្ធបានយកខ្សែចងទ្វារបន្ទប់ពីខាងក្រៅជាប់ រួចស្រែកឆោឡោប្ដឹងអាជ្ញាធរភូមិ និងប្រជាការពារភូមិឲ្យជួយអន្តរាគមន៍បង្កការភ្ញាក់ផ្អើលឈុលទាំងល្ងាចតែម្តង។
ក្រោយមកក៏យកប្តីកំហូចទៅផ្ទះវិញ មិនអោយមកបើកឡានក្នុងបន្ទប់ផ្ទះជួល ដើម្បីប្រឹងបានលុយយកទៅផ្គត់ផ្គង់គ្រួសារទៀតទេ ព្រោះភាសាបោករបស់លោកប្តីអស់ល័ក្ខណ៍ហើយ ៕
ដោយ ៖ សហការី
