សារព័ត៌មាន នគរវត្ត តែងតែនាំមុខគេជានិច្ច
ខេត្តកោះកុង ៖ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានលើកឡើងនូវសំណួរទី១ ថា «តើនៅចន្លោះថ្ងៃទី ១៧ មេសា ឆ្នាំ១៩៧៥ ដល់ថ្ងៃទី ៧ ខែមករា ឆ្នាំ១៩៧៩ ខ្មែរក្រហមបានសម្លាប់មនុស្សនៅកម្ពុជាដែរឬអត់?» ចម្លើយគឺសម្លាប់ ហើយមិនមែនសម្លាប់តែម្នាក់ ឬពីរនាក់ទេ តែគឺរាប់លាននាក់។
សម្តេចធិបតី ហ៊ុន ម៉ាណែត បានចោទសួរសំណួរទី២ ថា «តើការវាយចូលរបស់កងកម្លាំងរណសិរ្សសាមគ្គីសង្រ្គោះជាតិកម្ពុជា ដែលចាប់ផ្តើមពីថ្ងៃ ២ធ្នូ រហូតដល់ដើមឆ្នាំ១៩៧៩ និងដែលបានដេញខ្មែរក្រហមចេញ បានបញ្ឈប់ខ្មែរក្រហមកុំអោយសម្លាប់មនុស្សតទៀតឬអត់?» ចម្លើយគឺខ្មែរក្រហមបានរត់ចេញទៅហើយ លែងបានសម្លាប់មនុស្សទៀតហើយ ដូច្នេះការរំដោះក្នុងឆ្នាំ១៩៧៩ នេះគឺស្មើនឹងការសង្រ្គោះជីវិតប្រជាពលរដ្ឋ។
សម្តេចធិបតី ហ៊ុន ម៉ាណែត បានតបទៅម្សៀនៅក្រៅប្រទេសថា ទោះអ្នកឯងចង់ហៅថ្ងៃនោះថាជាថ្ងៃអ្វីក៏ហៅទៅ ប៉ុន្តែយើងត្រូវទទួលស្គាល់ថា «ការរំដោះ ៧មករា ១៩៧៩ គឺធ្វើអោយយើងរស់រានមានជីវិត និងមានអ្វីៗទំាងអស់នៅថ្ងៃនេះ»។
សម្តេចធិបតី ហ៊ុន ម៉ាណែត បានចោទសួរសំណួរទី៣ ថា «ហេតុអ្វីយើងត្រូវពឹងវៀតណាម?» នៅចុងឆ្នាំ១៩៧៨ យើងមានជម្រើស២ គឺអង្គការសហប្រជាជាតិ (ទិសខាងលិច) និងវៀតណាម (ទិសខាងកើត)។ ប៉ុន្តែអង្គការសហប្រជាជាតិមិនបញ្ជូនទ័ពមកទេ ព្រោះច្បាប់របស់អង្គការនេះមិនអាចបញ្ជូនទ័ពទៅប្រទេសណាមួយបានទេ បើគ្មានការសំណូមពរពីរដ្ឋាភិបាលប្រទេសនោះ ដូច្នេះចម្លើយគឺ «យើងគ្មានជម្រើស»។
សម្តេចធិបតី ហ៊ុន ម៉ាណែត បានថ្លែងដូចនេះនៅក្នុងឱកាសដែលសម្ដេចអញ្ជើញជាអធិបតីក្នុងពិធី «សម្ពោធដាក់ឱ្យប្រើប្រាស់ជាផ្លូវការស្ពានសម្តេចតេជោ ហ៊ុន សែន កោះយ៉ និងជួបសំណេះសំណាលជាមួយបងប្អូនកម្មករ និយោជិតចំនួន ១១០០០នាក់ក្នុងស្រុកមណ្ឌលសីមា ខេត្តកោះកុង» នៅព្រឹកថ្ងៃទី០៨ ខែមករា ឆ្នាំ២០២៤។
សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បាន អបអរសាទរ ខួបទី ៤៥ នៃទិវាជ័យជម្នះ ៧ មករា ថ្ងៃកំណេីតទី២ របស់យេីងទាំងអស់គ្នា ។
សម្តេចធិបតី មានប្រសាសន៍ថា ៖ សូមចងចាំនូវវីរ:ភាពដ៏អង់អាចក្លាហាន តស៊ូ និងលះបង់គ្រប់បែបយ៉ាងរបស់យុទ្ធជនដែលបានពលី និងខិតខំយ៉ាងលំបាកបំផុត ឆ្លងកាត់គ្រប់ឧបសគ្គ ដេីម្បីរំដោះប្រទេសពីរណ្តៅមរណ:នៃរបបដ៏ខ្មៅងងឹត ៣ឆ្នាំ ៨ខែ ២០ថ្ងៃ។
៧ មករា គឺជាថ្ងៃនៃការចងចាំនូវមហាវីរ:ភាព ដឹងគុណការតស៊ូរបស់យុវជនជំនាន់មុន បន្សល់ទុកមរតកនៃជីវិតប្រជាជនខ្មែរ ហេីយជាមូលដ្ឋានគ្រឹះសម្រាប់កម្ពុជា បច្ចុប្បន្ន ជាពិសេសបានឱ្យគេស្គាល់កម្ពុជា មិនត្រឹមតែជាវាលពិឃាត មកស្គាល់ កម្ពុជា ជាកម្ពុជាដែលពោរពេញដោយសន្តិភាព និងការអភិវឌ្ឍលេីគ្រប់វិស័យ ជាពិសេសជាទីមនោរម្យសម្រាប់មនុស្សផងគ្នា។ ៧ មករា ១៩៧៩ – ៧ មករា ២០២៤ ៕
ដោយ ៖ សិលា
