សារព័ត៌មាន នគរវត្ត តែងតែនាំមុខគេជានិច្ច
ខេត្តប៉ៃលិន ៖ ប្រវត្តិខេត្តត្បូងពេជ្រ ប៉ៃលិន មិនត្រឹមតែសម្បូរណ៍នូវធនធានធម្មជាតិ រ៉ែត្បូងប៉ុណ្ណោះ ខេត្តដ៏សុីវីល័យមួយនេះ ត្រូវបានកវីនិពន្ធ បទចំរៀង និពន្ធរឿងប្រលោមលោក ជាអក្សរសីល្ប៍ បន្សល់ទុកនូវ រឿងរ៉ាវអនុស្សាវរីយ៍ ផ្អែមល្ហែម ជូរចត់ សើច យំ ។ល។ ជាសិល្បះនៃថ្វីដៃអ្នកកវីនិពន្ធ។
បច្ចុប្បន្ន រ៉ែត្បូងនៅប៉ៃលិននៅតែអាចឱ្យពលរដ្ឋផ្សងសំណាង អ្នកខ្លះរស់ដោយសារព្យាយាមរែងរកត្បូងបាតស្ទឹង ខណៈនៅព្រឹកថ្ងៃទី៣១ ខែមករា ឆ្នាំ២០២៤ គេសង្កេតឃើញប្រជាពលរដ្ឋរស់នៅក្នុងខេត្តប៉ៃលិនតែប៉ុន្មាននាក់ប៉ុណ្ណោះ មុខដដែលៗបាននាំគ្នាចុះទៅក្នុងស្ទឹង ដើម្បីរែងយកកម្ទេចថ្មស្វែងរករ៉ែត្បូងដែលនៅសេសសល់ ដើម្បីយកទៅលក់សម្រាប់ផ្គត់ផ្គង់ជីវភាប្រចាំថ្ងៃ ខណៈដែលអ្នកខ្លះអាចរកប្រាក់ចំណូលបានចាប់ពី៣ទៅ៥ម៉ឺនរៀល ក្នុង១ថ្ងៃ ក្លាយជាមុខជំនាញរបស់ខ្លួនទៅហើយ ឯអ្នកខ្លះអាចរកបាន១០ទៅ២០ម៉ឺនរៀល តែក៏មានអ្នកមិនអាចរកបានសោះពេញ១ថ្ងៃក៏មានដែរ ។
ទោះបីជារ៉ែត្បូង ហាក់ដូចជាពុំសូវសម្បូរដូចពីកាលសម័យមុនក៏ដោយ តែក៏មានអ្នកភូមិខ្លះនៅតែបន្តនាំគ្នាផ្សងព្រេង ។ បើតាមប្រភពព័ត៌មានពីបុរសម្នាក់ ឈ្មោះ សាន្ត អាយុ៥០ឆ្នាំ និងឈ្នោះ ម៉ៅ ភេទប្រុស អាយុ៦២ឆ្នាំ រស់នៅក្នុងក្រុងប៉ៃលិន បានឱ្យដឹងថា ៖ ពួកគាត់បាននាំគ្នាចុះទៅក្នុងស្ទឹងនាពេលនេះ គឺដើម្បីជីកកកាយរាវរកកម្ទេចរ៉ែត្បូងដែលនៅសេសសល់ក្នុងស្ទឹង អាចយកទៅលក់ឱ្យឈ្មួញសម្រាប់ផ្គត់ផ្គង់ជីវភាពប្រចាំថ្ងៃ ។
ពួកគាត់ភាគច្រើន គឺអត់មានដីស្រែចម្ការដូចអ្នកផ្សេង ទើបពី១ថ្ងៃទៅ១ថ្ងៃ តែងតែយកដែកស្បែង ប៉ែលនិងបង្គីចុះទៅក្នុងស្ទឹងបយ៉ាខា នាំគ្នារែងរករ៉ែត្បូងតែម្តង ។ បើតាមប្រភពពីជនបរទេស១ក្រុមបានឱ្យដឹងថា ពួកគាត់មិនធ្លាប់ឃើញការរែងរករ៉ែត្បូងបែបនេះពីមុនទេ។ លុះសួរនាំប្រជាពលរដ្ឋពីរបៀបរែងរករ៉ែត្បួងរួចក៏នាំគ្នាខ្ចីកញ្ច្រែង ដើម្បីចុះទៅក្នុងស្ទឹងរែងសាកល្បងមើល ហើយជាការកម្សាន្តផងដែរ ។
សូមបញ្ជាក់ថា ៖ កម្ពុជា ជាប្រទេសអឆ្ឆរិយះ សំបូរទៅដោយធនធានធម្មជាតិ រ៉ែត្បូង រ៉ែមាស រ៉ែដែក ថ្មកែវ ថ្មម៉ាប ថ្មភក់ ។ល។ ដែលមិនងាយរងគ្រោះធម្មជាតិធ្ងន់ធ្ងរ៕
ដោយ ៖ សិលា
