សារព័ត៌មាន នគរវត្ត តែងតែនាំមុខគេជានិច្ច
ខេត្តមណ្ឌលគិរី៖ ខណៈតម្លៃគ្រាប់ស្វាយចន្ទីទទួលបានថ្លៃចាប់ពី៣.០០០រៀលទៅ៥.០០០រៀល នៅទូទាំងខេត្តមណ្ឌលគិរីមានផ្ទៃដីទទួលផល រហូតដល់ទៅជិត១ម៉ឺនហិកតា គិតត្រឹមចុងខែកុម្ភៈ ឆ្នាំ២០២៤ ។
លោក សុង ឃាង ប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្តមណ្ឌលគិរី បានថ្លែងឲ្យដឹងថា « សព្វថ្ងៃនៅខេត្តមណ្ឌលគិរី ផ្ទៃដីដាំដុះដំណាំស្វាយចន្ទី ផ្ទៃដីដាំ ដុះសរុប ១១ ១៣៦ ហិកតា (ក្រុមហ៊ុន ៣ ២៥៤ហិកតា) ហើយទំហំផ្ទៃដីដែលទទួលផលសរុបមានចំនួន៩៦៥០ហិកតា »។ លោក សុង ឃាង បន្តថា « ចម្ការស្វាយចន្ទីនៅតាម បណ្តាក្រុងស្រុកទាំង៥របស់ខេត្តរួមមាន ១.ស្រុកកែវ សីមា មាន៣ ៩៦០ហិកតា (ក្នុងនោះក្រុមហ៊ុន ៧៤១ ហិកតា) ផ្ទៃដីប្រមូលផល ៣ ៣៥៤ ហិកតា,២.ស្រុកកោះញែក៥០៩០ហិកតា(ក្រុមហ៊ុន ២ ២៩៨ហិកតា) ផ្ទៃដីប្រមូលផល ៤ ៤៣៨ ហិកតា ។ ៣.ស្រុកអូររាំង ៥៦៨ ហិកតា ផ្ទៃដីប្រមូលផល ៥៦៨ ហិកតា ។ ៤. ស្រុកពេជ្រាដា ១ ១២៩ ហិកតា (២១៥ ហិកតា )ផ្ទៃដីប្រមូលផល ៩០៥ ហិកតានិង៥. ក្រុងសែនមនោរម្យ ៣៨៩ ហិកតាផ្ទៃដីប្រមូលផល ៣៨៥ ហិកតា ។ ចំពោះគ្រាប់ស្វាយចន្ទីធម្មតាតម្លៃចាប់ពី ៣ ០០០រៀល ទៅ ៣ ៨០០៛/គ.ក្រ និងគ្រាប់ធំតម្លៃ ៥០០០៛/គ.ក្រ » ។
លោក សុង ឃាង ប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្តមណ្ឌលគិរី បានសំណូមពរដល់បងប្អូនប្រជាកសិករទាំងអស់ ត្រូវចេះសហការជាមួយមន្ត្រីជំនាញកសិកម្ម ឬអ្នកបច្ចេកទេសនានា ដែលនៅជិតបងប្អូន ដើម្បីអាចសិក្សាស្វែងយល់អំពីពូជដំណាំល្អ ឬវិធីសាស្ត្រក្នុងការដាំដុះថែទាំដំណាំឲ្យទទួលបានផលល្អ និងមានតម្លៃក្នុងទីផ្សារបានថ្លៃ៕
ដោយ៖ សូរិយា
