សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ ស្នងការដ្ឋាននគរបាលខេត្តបាត់ដំបង បានឱ្យដឹងនៅថ្ងៃទី១៤ ខែមីនា ឆ្នាំ២០២៤នេះថា៖ កម្លាំងនគរបាលលក្រុងបាត់ដំបង បានចុះស្រាវជ្រាវរហូតឈានដល់ការឃាត់ខ្លួនយុវជនម្នាក់ ក្រោយម្ដាយក្មេងស្រីរងគ្រោះប្ដឹងចោទប្រកាន់ពាក់ព័ន្ធករណីរួមភេទជាមួយកូនស្រីរបស់គាត់ ដែលទើបតែមានអាយុ ១៣ឆ្នាំ។
ប្រភពដដែលបន្តថា កម្លាំងផ្នែកជំនាញព្រហ្មទណ្ឌ នៃអធិការដ្ឋាននគរបាលក្រុងបាត់ដំបង កាលពីថ្ងៃទី២១ ខែកុម្ភៈ ឆ្នាំ២០២៤ បានទទួលបណ្តឹងពីម្តាយបង្កើតជនរងគ្រោះ មានករណី រួមភេទជាមួយអនីតិជនអាយុក្រោម ១៥ឆ្នាំ ជាកូនស្រីរបស់គាត់ ឈ្មោះ ដ-ល-ម ភេទស្រី អាយុ១៣ឆ្នាំ មានទីលំនៅភូមិសាលាបាឡាត់ សង្កាត់អូរម៉ាល់ ក្រុងបាត់ដំបង ខេត្តបាត់ដំបង កាលពីថ្ងៃទី១៦ ខែមករា ឆ្នាំ២០២៤ វេលាម៉ោង០០និង១០នាទី នៅត្រង់ចំណុចក្រុមទី០៦ ភូមិសាលាបាឡាត់ សង្កាត់អូរម៉ាល់ ក្រុងបាត់ដំបង ខេត្តបាត់ដំបង ។
ករណីនេះ ដោយអនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង រួមនឹងយោបល់លោកស្រីឧត្តមសេនីយ៍ត្រី រស់ ជីវី ស្នងការរងទទួលការងារប្រឆាំងការជួញដូរនិងការពារអនីតិជន និងមានការសម្របសម្រួលនីតិវិធីពីលោក កែវ សុជាតិ ព្រះរាជអាជ្ញាអមសាលាដំបូងខេត្តបាត់ដំបង កម្លាំងផ្នែកជំនាញនគរបាលយុត្តិធម៌ ដឹកនាំដោយលោកវរសេនីយ៍ឯក ពេជ្រ សារ៉ែន អធិការនគរបាលក្រុងបាត់ដំបង បានចុះធ្វេីការស្រាវជ្រាវ ដល់ថ្ងៃទី១៣ ខែមីនា ឆ្នាំ២០២៤ម្សិលមិញនេះ ទើបធ្វើការឃាត់ខ្លួនជនសង្ស័យម្នាក់ ឈ្មោះ ញិល ឈិនឡុង ភេទប្រុស អាយុ២០ឆ្នាំ មានទីលំនៅភូមិចំការសំរោង១ សង្កាត់ចំការសំរោង ក្រុងបាត់ដំបង ខេត្តបាត់ដំបង មកកាន់អធិការដ្ឋាននគរបាលក្រុងបាត់ដំបងដើម្បីធ្វើការសាកសួរ។
ក្រោយពីបានសាកសួរជនសង្ស័យ បានឆ្លើយសារភាពថាខ្លួនពិតជាបានធ្វើសកម្មភាពបានរួមភេទជាមួយក្មេងស្រីរងគ្រោះ ដ-ល-ម ភេទស្រី អាយុ១៣ឆ្នាំ ពិតប្រាកដមែន ។
បច្ចុប្បន្នកម្លាំងនគរបាលក្រុងបាត់ដំបងកំពុងកសាងសំណុំរឿងបញ្ជូនមកការិយាល័យជំនាញខេត្ត ដើម្បីចាត់ការបន្តតាមនីតិវិធី៕
ដោយ៖ តារា
