សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានជិះម៉ូតូមួយគ្រឿងបត់ឆ្លងផ្លូវស្របពេលមានរថយន្តម៉ាកfordមួយគ្រឿងពណ៌ខ្មៅមិនចាំស្លាកលេខ បើកយ៉ាងលឿនមកបុកពេញទំហឹង បណ្ដាលឲ្យមនុស្សខ្ទាតតាមរថយន្តស្លាប់ភ្លាមៗ បង្កការភ្ញាក់ផ្អើលកាលពីវេលាម៉ោង១១:៤០នាទីយប់ថ្ងៃទី២១ខែឧសភា ឆ្នាំ២០២៤ ចំណុចមុខផ្សាទំនើប ខេម៉ល ស្ថិតនៅតាមបណ្តោយមហាវិថីចោមចៅ សង្កាត់ចោមចៅទី១ ខណ្ឌពោធិសែនជ័យ រាជធានីភ្នំពេញ។
សពមានឈ្មោះ ហ៊ន សាវន ភេទប្រុសអាយុ៤៩ឆ្នាំមុខរបរជាកម្មករ បច្ចុប្បន្ន ស្នាក់នៅបន្ទប់ជួលនៅសង្កាត់ចក្រអង្រែលើ ខណ្ឌមានជ័យ មានស្រុកកំណើតនៅខេត្តព្រៃវែង។
តាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញ បុរសជនរងគ្រោះបានបើកម៉ូតូម៉ាក ហុងដាWAVEពណ៌ខ្មៅមួយគ្រឿងពាក់ស្លាកលេខ ស្ទឹងត្រែង 1A-4973 បើកចេញពីផ្លូវបេតុងរួចបត់ឆ្លងតាមបណ្តោយផ្លូវចោមចៅ ខណៈពេលឆ្លងដល់ពាក់កណ្តាលផ្លូវ ស្រាប់តែគេឃើញមានរថយន្តម៉ាក Ford ពណ៌ខ្មៅមួយគ្រឿងមិនចាំស្លាកលេខ បើកដោយបុរសម្នាក់តាមបណ្តោយផ្លូវវេងស្រេងពីកើតមកលិចក្នុងល្បឿនលឿនក៏ជ្រុលទៅបុកម៉ូតូពេញទំហឹងខ្ទាតទៅចិញ្ចើមផ្លូវចំណែកបុរសរងគ្រោះបានអូសតាមរថយន្តបោកក្បាលនៅហ្នឹងផ្លូវស្លាប់ភ្លាមៗ ចំណែករថយន្តបង្កបន្តល្បឿនបើករត់គេចខ្លួនបាត់ស្រមោល។
ក្រោយកើតហេតុខាងលើសមត្ថកិច្ចមូលដ្ឋានសហការជាមួយនឹងជំនាញចរាចរណ៍ចុះមកដល់វាស់វែងយកម៉ូតូជនរងគ្រោះទៅរក្សាទុកនៅអធិការដ្ឋានខណ្ឌពោធិសែនជ័យ រួចធ្វើកំណត់ហេតុប្រគល់សពឱ្យទៅក្រុមគ្រួសារយកទៅធ្វើបុណ្យតាមប្រពៃណី។ចំណែកឯរថយន្តបង្កសមត្ថកិច្ចជំនាញនិងធ្វើការស្រាវជ្រាវនៅពេលក្រោយ៕
ដោយ ៖ ភារ៉ា ដង្កោ
