តុលាការកំពូលរបស់វេណេហ្ស៊ុយអេឡា បញ្ជាឱ្យចាប់ខ្លួនប្រធានាធិបតីអាហ្សង់ទីន

យោងតាមសារព័ត៌មាន Miami Herald តុលាការកំពូល Venezuelan (TSJ) បានអនុម័តដីកាចាប់ខ្លួនប្រធានាធិបតីអាហ្សង់ទីន Javier Milei ពាក់ព័ន្ធនឹងការរឹបអូសយន្តហោះ Emtrasur របស់ក្រុមហ៊ុនអាកាសចរណ៍Venezuelanនៅទីក្រុង Buenos Aires។
កន្លងមក អគ្គមេធាវី Tarek William Saab បានបញ្ជាឱ្យចាប់ខ្លួនប្រធានាធិបតី Milei រួមជាមួយនឹងអគ្គលេខាធិការនៃវិមានប្រធានាធិបតី Karina Milei និងរដ្ឋមន្ត្រីសន្តិសុខ Patricia Bullrich ដោយចោទប្រកាន់ពីបទប្រព្រឹត្ត “ចោរកម្មធ្ងន់ធ្ងរ ប្លន់ប្រដាប់អាវុធ ការឃុំខ្លួនដោយខុសច្បាប់” និង “ការជ្រៀតជ្រែកដោយខុសច្បាប់លើសុវត្ថិភាពនៃប្រតិបត្តិការអាកាសចរណ៍ស៊ីវិល” ។
ភាពតានតឹងរវាងប្រទេសនៅអាមេរិកខាងត្បូងទាំងពីរបានកើតឡើងជុំវិញយន្តហោះ Boeing 747-300FM របស់ក្រុមហ៊ុន Emtrasur Cargo ដែលទិញពីក្រុមហ៊ុន Mahan Air ដែលជាក្រុមហ៊ុនអាកាសចរណ៍ឯកជនអុីរ៉ង់ដែលមានទីស្នាក់ការកណ្តាលនៅទីក្រុងតេអេរ៉ង់។ នៅខែសីហា ឆ្នាំ2022 អាជ្ញាធរអាហ្សង់ទីនបានរឹបអូសយន្តហោះតាមសំណើរបស់សហរដ្ឋអាមេរិក ដោយផ្អែកលើការដាក់ទណ្ឌកម្មប្រឆាំងនឹងអុីរ៉ង់។
វេណេហ្ស៊ុយអេឡាបានតវ៉ាជាយូរមកហើយចំពោះការរឹបអូសយន្តហោះនេះ ដោយលើកហេតុផលថា អាហ្សង់ទីនបានបំពានច្បាប់អន្តរជាតិ និងទាមទារសំណងពីទីក្រុង Buenos Aires។ នៅខែមីនា ឆ្នាំ 2024 ការ៉ាកាសបានបិទដែនអាកាសរបស់ខ្លួនចំពោះការហោះហើរទៅនិងមកពីប្រទេសអាហ្សង់ទីន។ ទន្ទឹមនឹងនេះ រដ្ឋាភិបាលអាហ្សង់ទីនបានប្រកាសថា “គ្មានការចាប់អារម្មណ៍” ទាំងស្រុងចំពោះ “សំណើមិនសមហេតុសមផល” ដែលស្នើឡើងដោយរដ្ឋាភិបាលវ៉េណេហ្ស៊ុយអេឡា៕ ដោយ៖ ធីរីណា

រូប​ថត​៖ siagon online