សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តស៊េរីទំនើប២គ្រឿង ដោយសារតែបើកបរខ្វះការប្រុងប្រយ័ត្ន ហើយបានជ្រុលទៅបុកគ្នាយ៉ាងពេញទំហឹង បណ្ដាលឲ្យភាគីខាងរថយន្តហាយឡែនឌឺ ដែលបើកបរដោយបុរសជាទាហានម្នាក់ បានរងរបួសបាក់ភ្លៅម្ខាង ចំណែកឯរថយន្តមួយគ្រឿងទៀតម៉ាក BMW គ្រាន់តែខូចខាតរថយន្តប៉ុន្តែ ។
ហេតុការណ៍គ្រោះថ្នាក់ចរាចរណ៍ ខាងលើនេះ បានកើតឡើងនៅវេលាម៉ោង២និង៣០នាទីរំលងអធ្រាត្រ ឈានចូលថ្ងៃទី១៥ ខែសីហា ឆ្នាំ២០១៦ តាមបណ្ដាលផ្លូវសហព័ន្ធរុស្ស៉ីកែងនិងផ្លូវព្រះមុនីវង្ស សង្កាត់ស្រះចក ខណ្ឌដូនពេញ ។
តាមប្រភពព័ត៌មានពីនគរបាលមូលដ្ឋានបានឲ្យដឹងថា នៅមុនពេលកើតហេតុ គេឃើញរថយន្តមួយគ្រឿងម៉ាក BMW ពណ៌ស ពាក់ស្លាកលេខភ្នំពេញ 2AG-2838 ដោយជិះគ្នា៣នាក់ ក្នុងនោះមានស្ត្រីម្នាក់ បើកបរតាមបណ្តោយផ្លូវសហព័ន្ធរុស្ស៉ី ក្នុងល្បឿនយ៉ាងលឿន លុះបើកមកដល់ចំណុចកើតហេតុ ត្រង់ចំណុចផ្លូវកែងព្រះមុនីវង្ស ស្រាប់តែរថយន្តមួយគ្រឿងទៀតម៉ាក Highlander ពណ៌ស ពាក់ស្លាកលេខភ្នំពេញ 2X-0354 ដែលបើកបរដោយមន្ត្រីយោធាម្នាក់ ក្នុងល្បឿនយ៉ាងលឿនដូចគ្នា ដោយខ្វះការប្រុងប្រយ័ត្នបានជ្រុលទៅបុកគ្នាយ៉ាងពេញទំហឹង បណ្តាលឲ្យ ម្ចាស់រថយន្ត Highlanderដែលជាមន្ត្រីយោធា រងរបួសបាក់ភ្លៅម្ខាង ហើយត្រូវបានរថយន្តសាមុយដឹកទៅសង្គ្រោះភ្លាមៗផងដែរ ។ ចំណែកឯភាគីខាងរថយន្ត BMW មិនមានរងរបួសនោះទេគ្រាន់តែខូចខាតរថយន្តតែប៉ុណ្ណោះ ។
ក្រោយកើតហេតុរថយន្តទាំង២ ត្រូវបាននគរបាលចរាចរជំនាញ ចុះទៅវាស់វែង និងស្ទួចយករថយន្តទាំង២គ្រឿងនេះ ទៅរក្សាទុកនៅការិយាល័យនគរបាលចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ ដើម្បីដោះស្រាយគ្នាតាមនីតិវិធី ៕ស ដារ៉ា
