សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ នគរបាលស្រុកស្វាយជ្រំ បានចុះល្បាតប្រទះឃើញទូកនេសាទត្រីខុសច្បាប់ជនជាតិវៀតណាម ដែលរំលោភចូលក្នុងទឹកដីកម្ពុជា។
ការចុះល្បាតធ្វើឡើងនៅថ្ងៃទី១១ ខែតុលា ឆ្នាំ២០២៤ ត្រង់ចំណុចព្រែកនៀល ស្ថិតក្នុងភូមិបាយ៉ាប ឃុំបាសាក់ ស្រុកស្វាយជ្រំ។
លោកវរសេនីយ៍ឯក សោម សុភ័ណ្ឌ អធិការនគរបាលស្រុកស្វាយជ្រំ បានអោយដឹងនៅថ្ងៃទី១២ខែតុលា ឆ្នាំ២០២៤នេះថា លោកបានដឹកនាំកម្លាំង ល្បាតចល័តពិនិត្យមើលក្នុងភូមិសាស្ត្រ ត្រង់ចំណុចព្រែកនៀល ស្ថិតនៅភូមិបាយ៉ាប ឃុំបាសាក់ ស្រុកស្វាយជ្រំ ខេត្តស្វាយរៀង បានប្រទះឃើញទូកនេសាទមួយគ្រឿងកំពុងធ្វើសកម្មភាពនេសាទត្រី។
លោកបន្តថា កម្លាំងរបស់លោកបានធ្វើការឃាត់ទូកនេសាទត្រីខុសច្បាប់ខាងលើជារបស់ជនជាតិវៀតណាមមួយគ្រឿងដោយមានការសហការពីលោកនាយរងប៉ុស្តិ៍នគរបាលបាសាក់ លោកនាយរងប៉ុស្តិ៍នគបាលច្រកទ្វារតំបន់ព្រំដែនស្រែបារាំង ខណ្ឌរដ្ឋបាលជលផលខេត្តស្វាយរៀង។
ក្នុងប្រតិបត្តិការនេះ សមត្ថកិច្ចបង្រ្កាបបានសម្ភារទូកស្មាចប្រវែង៥.០៩ម៉ែត្រ១គ្រឿង, ម៉ាស៊ីន ១៣សេះ ១គ្រឿង, អាគុយ ១២០អំពែ១គ្រឿង និងឧបករណ៍នេសាទខុសច្បាប់(ឆក់ត្រជាក់)។ ចំណែកជនសង្ស័យបានជិះទូកផ្សេងគេចខ្លួនពីកន្លែងកើតហេតុ។
បច្ចុប្បន្ន វត្ថុតាងត្រូវបានសមត្ថកិច្ចប្រគល់ទៅខាង ខណ្ឌរដ្ឋបាលជលផលខេត្ត យកទៅរក្សាទុកដើម្បីដោះស្រាយតាមច្បាប់៕
ដោយ៖ សុថាន
