សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាលៈ មុខសញ្ញាជួញដូរគ្រឿងញៀនម្នាក់ត្រូវបានសមត្ថកិច្ចនករបាលស្រុកលើកដែកបង្រ្កាបចាប់ខ្លួន ខណៈកំពុងអង្គុយរងចាំមួយមកទិញគ្រឿងញៀននៅក្បែរស្រះទឹក ក្នុងបរិវេនវត្តគីរីរតនារ៉ាម ហៅវត្តកំពង់ភ្នំ ស្ថិតក្នុងភូមិអំពិលទឹក ឃុំកំពង់ភ្នំ ស្រុកលើកដែក ខេត្តកណ្តាល កាលពីវេលាម៉ោង០៩ និង១៥នាទីព្រឹក ថ្ងៃទី២៧ ខែសីហា ឆ្នាំ២០១៦ ។
មន្ត្រីនគរបាលស្រុកលើកដែកបានឲ្យដឹងថា ជនល្មើសជាមុខសញ្ញាជួញដូរគ្រឿងញៀននោះឈ្មោះ ម៉ាប់ សម្បត្តិ ហៅអាបាត់ ភេទប្រុស អាយុ២១ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅភូមិក្បាលជ្រោយ ឃុំកំពង់ភ្នំ ស្រុកលើដែក ខេត្តកណ្តាល ។
ប្រភពដដែលបានបន្តថា ក្នុងប្រតិបត្តិការបង្រ្កាបឃាត់ខ្លួនមុខសញ្ញាខាងលើនេះ សមត្ថកិច្ចរឹបអូសវត្ថុតាងរួមមាន៖ ម៉្សៅក្រាមពណ៌សថ្លា សង្សយ័ជាសារធាតុញៀនម៉ាទឹកកកចំនួន០២កញ្ចប់តូច, ដែកកេះ ចំនួន០១, កាបូបដៃពណ៌ខ្មៅចំនួន០១, ទូរសព្ទ័ដៃ០១គ្រឿង និងម៉ូតូមួយគ្រឿង ធុនសេ១០០កូរ៉េ ពណ៌ក្រហម គ្មានស្លាកលេខ ។
ប្រភពដដែលបានបន្តទៀតថា ជនល្មើសជាមុខសញ្ញាជួញដូរគ្រឿងញៀននៅក្នុងមូលដ្ឋានឃុំកំពង់ភ្នំដែលសមត្ថកិច្ចកំណត់និងតាមដាននាពេលកន្លងមក ។ លុះមកដល់ព្រឹក ថ្ងៃទី២៧ ខែសីហា ឆ្នាំ២០១៦ សមត្ថកិច្ចទទួលបានព័ត៌មានថាជនល្មើសធ្វើសកម្មភាពយកថ្នាំញៀនទៅជួញដូរនៅមាត់ស្រះក្នុងបរិវេនវត្តកំពង់ភ្នំ ទើបសមត្ថកិច្ចចុះទៅចាំឃ្លាំមើល រហូតឈានដល់ឃាត់ខ្លួនជនល្មើសរួមជាមួយវត្ថុតាងជាក់ស្តែង ដើម្បីកសាងសំណុំរឿងចាត់ការតាមច្បាប់ ។
ក្រោយពីឃាត់ខ្លួនជនល្មើសឈ្មោះ ម៉ាប់ សម្បត្តិ បានសារភាពថា ថ្នាំញៀន២កញ្ចប់ខាងលើនេះរូបគេបានទទួលពីបក្ខពួកម្នាក់ទៀតឈ្មោះ ណាង ណាន ភេទប្រុស អាយុ២១ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅក្នុងភូមិអំពិលទឹក ឃុំកំពង់ភ្នំ ស្រុកលើកដែក ដើម្បីយកទៅជួញដូរតាមការណាត់ ខណៈកំពុងអង្គុយរងចាំអ្នកមកទិញក៏ត្រូវសមត្ថកិច្ចចាប់ខ្លួនបានតែម្តង ។ ពាក់ព័ន្ធករណីនេះសមត្ថកិច្ចនគរបាលស្រុកលើកដែកបានកសាងសំណុំរឿង និងសាវតាជាតិជនល្មើសឈ្មោះ ណាង ណាន ដែលកំពុងរត់គេចខ្លួន ដើម្បីបញ្ជូនទៅកាន់សាលាដំបូងខេត្តកណ្តាលចាត់ការតាមនីតិវិធីច្បាប់ ៕ ស្អាងជ័យ
សូមអានបន្ត ៖ កីឡា E-Sport ចង់ប្រជ្រៀតខ្លួនចូលទៅក្នុងព្រឹត្តិការណ៍កីឡាអូឡាំពិកឆ្នាំ២០២០នៅជប៉ុន
