លោកអភិសន្តិបណ្ឌិត ស សុខា ជំរុញឱ្យបង្កើតក្រុមការងារចល័ត ពិនិត្យផ្លាកលេខយានយន្តក្លែងក្លាយ

ភ្នំពេញ ៖ លោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានជំរុញដល់អ្នកពាក់ព័ន្ធបង្កើតក្រុមការងារចល័ត ដើម្បីធ្វើការពិនិត្យករណីផ្លាកលេខយានយន្តក្លែងក្លាយ ក្នុងគោលបំណងធ្វើយ៉ាងណាឱ្យមានប្រសិទ្ធភាព នៃការបង្ក្រាបបទល្មើស។

ការលើកឡើងរបស់ លោកអភិសន្តិបណ្ឌិត ស សុខា ដោយសារការចរាចរផ្លាកលេខយានយន្តក្លែងក្លាយ នៅតែបន្តកើតមានឡើងនៅតាមបណ្តោយដងផ្លូវសាធារណនានា។

លោកអភិសន្តិបណ្ឌិត ស សុខា បានលើកឡើងបែបនេះ នាឱកាសអញ្ជើញអធិបតីពិធីបិទសន្និបាតបូកសរុបសភាពការណ៍ និងលទ្ធផលកិច្ចប្រតិបត្តិការក្នុងការរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គមប្រចាំឆ្នាំ២០២៤ និងដាក់ចេញទិសដៅការងារឆ្នាំ២០២៥ របស់អគ្គស្នងការដ្ឋាននគរបាលជាតិ នាពេលថ្មីៗនេះ នៅសាលប្រជុំអគារ S នៃទីស្តីការក្រសួងមហាផ្ទៃ។

លោកអភិសន្តិបណ្ឌិត ស សុខា បានឱ្យដឹងថា ក្រុមមន្រ្តីមានសមត្ថកិច្ចត្រូវតែរួមសហការគ្នា បើកប្រតិបត្តិការបង្ក្រាបផ្លាកលេខយានយន្តក្លែងក្លាយ ព្រោះទាំងរថយន្ត និងម៉ូតូការបំពាក់ផ្លាកលេខក្លែងក្លាយនៅតែកើតមានឡើង ខណៈផ្លាកលេខក្លែងក្លាយពេលខ្លះមើលអត់ដឹងនោះទេ ដោយសារមានការជាន់លេខដូចគ្នា។

លោកអភិសន្តិបណ្ឌិត ស សុខា មានប្រសាសន៍ថា «ខ្ញុំសូមឱ្យយកចិត្តទុកដាក់ ហើយជាពិសេសពិនិត្យក្នុងការបង្កើតក្រុមចល័តមួយ ហើយមានតាប់លេត ហើយមានការស្នើសុំការប្រើប្រាស់ពីក្រសួងសាធារណការ និងដឹកជញ្ជូន ដើម្បីយល់ព្រមទៅលើផ្លាកលេខឡានទាំងអស់នោះ។ មួយក្រុមនោះអត់មានច្រើនទេ ត្រឹមតែ៤ទៅ៥នាក់ប៉ុណ្ណោះ ដោយមានរឿងអីយើងឆែកភ្លាម ព្រោះផ្លាកលេខក្លែងក្លាយយើងមើលអត់ដឹងនោះទេ ព្រោះគាត់ជាន់លេខដូចគ្នា ផ្លាកលេខមួយថាបាត់ គាត់ទៅជាន់លេខមួយទៀត ឲ្យបំពាក់លើឡានមួយទៀត ប៉ុន្តែឡានហ្នឹងវាអត់ត្រូវផ្លាកលេខ។ អីចឹងអាហ្នឹងស្រួលរកទេប៉ុន្តែបើឲ្យយើងមើលភ្នែកទទេថា ផ្លាកលេខហ្នឹងក្លែងក្លាយយើងមើលអត់ដឹងទេ»។

សម្រាប់ការងារបង្កើតក្រុមការងារពិនិត្យផ្លាកលេខក្លែងក្លាយនេះ ឯកឧត្ដមអភិសន្តិបណ្ឌិត ក៏ស្នើឱ្យសមត្ថកិច្ចបង្កើនការយកចិត្តទុកដាក់ខ្ពស់ ក្នុងការអនុវត្តព្រោះផ្លាកលេខក្លែងក្លាយនៅតែជាបញ្ហាប្រឈមនៅក្នុងសង្គមជាតិ។ លោក បន្ដថា ក្នុងករណីរកឃើញថា ពិតជាមានក្លែងបន្លំលើការធ្វើផ្លាកលេខក្លែងក្លាយត្រូវតែអនុវត្តទោសយ៉ាងតឹងរឹងបំផុត៕

ដោយ ៖ សិលា