សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កំពុងបើករថយន្ដ បុរសវ័យចំណាស់ម្នាក់ឃើញចៅស្រីដេកក្នុងរថយន្ដមិនស្រួល ទាញដៃអោយដេក ក៏ជ្រុលចង្កូតរថយន្ដទៅបុកបង្គោលភ្លើងក្បែរចីញ្ចើមផ្លូវបាក់១ដើម ក្រឡាប់រថយន្ដផ្ងារជើងម្ចាង រងរបួសស្រាល៣នាក់ ។ ហេតុការណ៍គ្រោះថ្នាក់ចរាចរណ៍នេះបង្កការភ្ញាក់ផ្អើលកាលពីវេលាម៉ោង១០ និង១៥នាទី ព្រឹកថ្ងៃទី០៧ ខែមករា ឆ្នាំ២០២៥ ស្ថិតតាមបណ្ដោយផ្លូវ១៥១ក្នុងសង្កាត់ពញាពន់ ខណ្ឌព្រែកព្នៅ ។
យោងតាមប្រភពព័ត៌មានពីម្ចាស់រថយន្ដបានប្រាប់អោយដឹងថា មុនពេលកើតហេតុរូបគាត់បានបើករថយន្ដតូយ៉ូតា ឡាក់វីហ្គាមួយគ្រឿង ពណ៌ទឹកប្រាក់ ពាក់ផ្លាកលេខភ្នំពេញ 2I-8389 ធ្វើដំណើរតាមបណ្ដោយផ្លូវជាតិលេខ៥ ឆ្ពោះទៅផ្លូវ១៥១ ដើម្បីទៅលេងកូនស្រីនៅភ្នំប្រសិទ្ធ រួមដំណើរប្រពន្ធនិងចៅស្រីមានគ្នា៣នាក់ លុះធ្វើដំណើរជិតដល់ចំណុចកើតហេតុខាងលើ បានឃើញចៅស្រីដេកក្នុងរថយន្ដមិនស្រួល ក៏ទាញដៃចៅស្រីដេកអោយស្រួល ក៏ស្រាប់តែជ្រុលដៃប៉ះចង្កូតរថយន្ដរេចង្កូតទៅបុកបង្គោលភ្លើងក្បែរចីញ្ចើមផ្លូវបាក់១ដើម ចំណែករថយន្ដក្រឡាប់ផ្ងារជើងម្ខាងធ្លាក់ជិតដល់ទឹកបឹង។ ភ្លាមៗនោះប្រជាពលរដ្ឋដែលនៅជិតទីតាំងចំណុចកើតហេតុបានឃើញក៏ជួយវៃកញ្ចក់រថយន្ដជួយជនរងគ្រោះទាំង៣នៅក្នុងរថយន្ដចេញមកក្រៅ បណ្ដាលរងរបួសស្រាល៣នាក់ បន្ទាប់មកដោយឃើញសភាពស្រ្ដីនិងចៅស្រីភ័យខ្លាំងពេក ក៏បញ្ជូនទៅសង្គ្រោះបឋមនៅឯមន្ទីពេទ្យ ។
ក្រោយកើតហេតុសមត្ថកិច្ចមូលដ្ឋានចុះមកដល់កន្លែងកើតហេតុឃើញខូចខាតដល់សម្បត្តិរដ្ឋ ក៏បានទំនាក់ទំនងទៅសមត្ថកិច្ចជំនាញចរាចរណ៍ចុះមកធ្វើការវាស់វែងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំម្ចាស់រថយន្ដធ្វើការដោះស្រាយតាមច្បាប់៕
ដោយ ៖ ភារ៉ា ដង្កោ
