សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យុវជនម្នាក់ជិះម៉ូតូ១គ្រឿងក្នុងល្បឿនយ៉ាងលឿនខណៈពេលទៅដល់ចំណុចផ្លូវកោងរអិលដួលអូសទៅបុកម៉ូតូ១គ្រឿងកំពុងជិះបញ្ច្រាស់ទិសដៅគ្នាបណ្តាលឱ្យរងរបួសធ្ងន់ស្រាល៣នាក់ត្រូវបានក្រុមសង្រ្គោះអង្គភាព៧១១ ដឹកយកទៅសង្រ្គោះបន្ទាន់ ។
ហេតុការណ៍នេះបានកើតឡើងកាលពីម៉ោង៤រសៀលថ្ងៃទី ១៣ ខែមករា ឆ្នាំ២០២៥ ស្ថិតតាមបណ្តោយផ្លូវបេតុង ភូមិអករំដួល ខណ្ឌពោធិ៍សែនជ័យ រាជធានីភ្នំពេញ។
ប្រភពព័ត៌មាននៅកន្លែងកើតហេតុបានឲ្យដឹងថា នៅមុនកើតហេតុគេបានឃើញម៉ូតូហុងដាហ្សូមម័រពណ៌សរលាយទឹកក្រូចពាក់ស្លាកលេខកណ្តាល1AJ-1186 ជិះគ្នា២នាក់ធ្វើដំណើរតាមបណ្តោយផ្លូវបេតុងក្នុងទិសដៅពីលិចទៅកើត។ខណៈមកដល់ចំណុចកើតហេតុស្រាប់តែមានម៉ូតូ១គ្រឿងម៉ាកស៊ុយស៊ូគីនិច ពណ៌ក្រហមលាយខ្មៅ ពាក់ស្លាកលេខភ្នំពេញ1GW-1645 ជិះម្នាក់ឯងធ្វើដំណើរតាមបណ្តោយផ្លូវបេតុងក្នុងទិសដៅពីកើតទៅលិចក្នុងល្បឿនយ៉ាងលឿនដល់ចំណុចផ្លូវកោងបានដួលអូសទៅផ្លូវម្ខាងទៀតជ្រុលទៅបុកម៉ូតូរងគ្រោះដួលគរលើគ្នាបណ្តាលឱ្យរងរបួសធ្ងន់ស្រាល៣នាក់ ត្រូវបានក្រុមសង្រ្គោះអង្គភាព៧១១ ដឹកយកទៅសង្រ្គោះបន្ទាន់ ។
បន្ទាប់ពីកើតហេតុសមត្ថកិច្ចមូលដ្ឋានបានវាស់វែងយកម៉ូតូទាំង២គ្រឿងដាក់អែបខាងដើម្បីឱ្យភាគីទាំងសងខាងធ្វើការសម្របសម្រួសគ្នា៕
ដោយ៖ ជ្រោយពេជ្រ
