ខេត្តកណ្តាលៈ មុខសញ្ញាជួញដូរគ្រឿងញៀនម្នាក់ត្រូវបានសមត្ថកិច្ចនគរបាលស្រុកខ្សាច់កណ្តាលស្រាវជ្រាវបង្រ្កាបឃាត់ខ្លួន កាលពីវេលាម៉ោង១៩ និង១០នាទី ថ្ងៃទី៣១ ខែសីហា ឆ្នាំ២០១៦ ស្ថិតក្នុងភូមិបារាជ ឃុំស្វាយជ្រំ ស្រុកខ្សាច់កណ្តាល ដកហូតវត្ថុតាងថ្នាំញៀនប្រភេទមេតំហ្វេតាមីន ហៅម៉ាទឹកកកចំនួន០២កញ្ចប់តូច, ដែកកេះចំនួន០១ និងកញ្ចប់បារីចំនួន០១ ដើម្បីកសាងសំណុំរឿងចាត់ការតាមច្បាប់ ។
មន្ត្រីនគរបាលស្រុកខ្សាច់កណ្តាលបានឲ្យដឹងថា ជនសង្ស័យឈ្មោះ ធី រដ្ឋា ភេទប្រុស អាយុ១៧ឆ្នាំ ជនជាតិខ្មែរ មុខរបរ មិនពិតប្រាដក មានទីលំនៅភូមិបារាជ ឃុំស្វាយជ្រំ ស្រុកខ្សាច់កណ្តាល ។
ប្រភពដដែលបានបន្តថា ជនសង្ស័យខាងលើនេះជាមុខសញ្ញាជួញដូរគ្រឿងញៀននៅក្នុងមូលដ្ឋានដែលសមត្ថកិច្ចកំណត់ និងតាមដាននាពេលកន្លងមក ។ លុះមកដល់ថ្ងៃទី៣១ ខែសីហា ឆ្នាំ២០១៦ សមត្ថកិច្ចទទួលបានព័ត៌មានថា ជនសង្ស័យរូបនេះយកគ្រឿងញៀនទៅធ្វើសកម្មភាពជួញដូរ ទើបសមត្ថកិច្ចចុះឃ្លាំមើលរហូតឈានដល់ធ្វើការឃាត់ខ្លួនជនល្មើសរួមជាមួយវត្ថុតាង ដើម្បីចាត់ការតាមច្បាប់។
ជនសង្ស័យបានសារភាពប្រាប់សមត្ថកិច្ចប៉ូលិសថា ថ្នាំញៀនខាងលើនេះរូបគេបានទិញពីមេក្លោងឈ្មោះ រតនា ភេទប្រុស អាយុប្រហែល២២ឆ្នាំ នៅភូមិអរិយក្សត្រ ឃុំអរិយ៍ក្សត្រ ស្រុកល្វាឯម ខេត្តកណ្តាល ដើម្បីធ្វើសកម្មភាពជួញដូរបន្តទៅឲ្យអ្នកប្រើប្រាស់ ខណៈកំពុងរៀបចំធ្វើសកម្មភាពក៏ត្រូវសមត្ថកិច្ចចាប់ខ្លួនតែម្តង ៕ ស្អាងជ័យ
សារព័ត៌មាន នគរវត្ត តែងតែនាំមុខគេជានិច្ច
