ព័ត៌មានទាន់ហេតុការណ៍៖

ពលរដ្ឋភូមិទួលកី រអ៊ូរទាំរឿងមេភូមិជួលដីទីស្នាក់ការភូមិជាកន្លែងស្តុកអេតចាយ

ចែករំលែក៖

ភ្នំពេញ ៖ ដីទីស្នាក់ការភូមិទួលកី សង្កាត់ភ្លើងឆេះរទេះ ខណ្ឌពោធិ៍សែនជ័យ ត្រូវបានអ្នកស្រីមេភូមិ ជួលទីតាំងខាងលើ ទៅជាកន្លែង គ ស្តុក ដែកអេតចាយទៅវិញ ធ្វើឲ្យបាត់បង់សណ្តាប់ សោភណ្ឌភាព បង្កឲ្យមានការរអ៊ូរទាំ និងរិះគន់ពីសំណាក់បងប្អូនប្រជាពលរដ្ឋក្នុងមូលដ្ឋាន ។

តាមប្រជាពលរដ្ឋបានឲ្យដឹងថា ដីទីតាំងទីស្នាក់ការភូមិទួលកីខាងលើ កន្លងមក ត្រូវបានថៅកែអេតចាយ នៅជាប់នោះ សុំដាក់រថយន្ត និងដែកអេតចាយបន្តិចបន្តួចជាបណ្តោះអាសន្ន ជាថ្នូរនឹងទឹកប្រាក់២០ដុល្លារក្នុង១ខែ ក៏ប៉ុន្តែរហូតមកដល់ពេលនេះ គំនរដែកក្លាយទៅជា គំនរស្តុកដ៏ធំមួយ ដើម្បីបម្រើប្រយោជន៍ផ្ទាល់ខ្លួនទៅវិញ ។ បរិវេណ ទីស្នាក់ការទាំងខាងមុខ ទាំងខាងក្រោយ ពោរពេញទៅដោយគំនរ ស្តុកដែកទាំងថ្មី និងចាស់ ធ្វើឲ្យបាត់បង់សណ្តាប់ធ្នាប់ សោភណ្ឌភាព ។

បើតាមអ្នកស្រី ជូ ជា មេភូមិទួលកី សង្កាត់ភ្លើងឆេះរទេះ បានប្រាប់ឲ្យដឹងកន្លងមកថា ថៅកែអេតចាយ បានសុំគាត់ យកទីធ្លាដីទីស្នាក់ការភូមិ សំចតរថយន្ត និងដាក់ដែកអេតចាយ តិចតួចជាបណ្តោះអាសន្ន ហើយថៅកែអេតចាយជួយដល់ភូមិវិញ នូវទឹកប្រាក់២០ដុល្លារក្នុង១ខែ សម្រាប់ទ្រទ្រង់កែលំអ ក្នុងភូមិរបស់លោកស្រី ។

ពលរដ្ឋរិះគន់ផងដែរ ដល់ផ្ទះ អេតចាយ ដែលស្ថិតនៅផ្លូវជាតិលេខ៣ ជាប់ទីស្នាក់ការភូមិទួលកី មិនត្រឹមតែយកដែក ទៅគរស្តុក ដូចភ្នំនៅក្នុងបរិវេណ ទីស្នាក់ការ ប៉ុណ្ណោះទេ គំនរដែក ដាក់គ ហៀរមកដល់ចិញ្ចើមផ្លូវជាតិ ចតទាំងរថយន្តលើចិញ្ចើមផ្លូវកៅស៊ូ បង្កឲ្យប្រឈមមុខទៅនឹងគ្រោះថ្នាក់ចរាចរណ៍ និងគ្រោះថ្នាក់ផ្សេងៗ ។

ពលរដ្ឋបានឲ្យដឹងថា ទីតាំងផ្ទះអេតចាយខាងលើ យកចិញ្ចើមផ្លូវសាធារណៈមកបម្រើផលប្រយោជន៍ផ្លាល់ខ្លួន ប៉ះពាល់សណ្តាប់ធ្នាប់ ចរាចរណ៍ ហើយពលរដ្ឋ ក៏បានប្តឹង រាយការណ៍ទៅអាជ្ញាធរដែរ រហូតដល់អាជ្ញាធរថ្នាក់ខណ្ឌ សន្តិសុខសាលាខណ្ឌពោធិ៍សែនជ័យបានត្រឹមចុះអើតមើល ហើយចាកចេញទៅបាត់ មិនហ៊ានមាត់ក ឬមានវិធានការ ចំពោះផលប៉ះពាល់ឡើយ ធ្វើឲ្យពលរដ្ឋងឿងឆ្ងល់ សង្ស័យបារមីថៅកែអេតចាយ ធំជាងបារមីអាជ្ញាធរ ភូមិ សង្កាត់ ខណ្ឌទៅទៀត ។

ពលរដ្ឋលេចឮមាត់គ្រប់គ្នាទៅហើយ ខណៈដែលទីតាំងខាងលើ មានលើកស្លាកគណបក្ស នៅពីខាងមុខ ខាងក្រោយ សុទ្ធតែអេតចាយ គគ្មានសណ្តាប់ធ្នាប់ បាត់អស់សោភណ្ឌភាព ៕ សុខាសែនជ័យ

 

image3 image2 image1 image4
សូមអានបន្ត ៖ លក់ធ្យូងមិនចំណេញ បែកគំនិតជួញដូរថ្នាំញៀន នគរបាលចាប់ដាក់ខ្នោះ


ចែករំលែក៖