សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យោងតាមវីដេអូឃ្លឹបមួយបានបង្ហោះនៅលើបណ្ដញសង្គមហ្វេសប៊ុកបង្កការភ្ញាក់ផ្អើលដល់អាជ្ញាធរខណ្ឌកំបូល ចុះទៅអន្តរគមន៍ភ្លាមៗ ខណៈបុរសពីរនាក់ បានធ្វើទង្វើមិនសមរម្យយកទុយយោទឹក និងបំពង់ពន្លត់អគ្គិភ័យ បាញ់ផ្សែង និងទឹក ដាក់អាជីវករលក់ដូរក្បែរបង្កការផ្អើលតែម្តង។
បើតាមប្រភពព័ត៌មានពីក្រុមការងារនៃរដ្ឋបាលខណ្ឌកំបូល ដឹកនាំដោយលោក ទ្រី ណារ៉េត អភិបាលរងខណ្ឌកំបូល បានឱ្យដឹងថា ជាក់ស្ដែងកម្លាំងជំនាញ បានចុះពិនិត្យរកឃើញថា៖ ម្ចាស់ទីតាំងឈ្មោះ ប៊ុន វ៉ាន់សៃ ភេទប្រុស អាយុ ៤៨ឆ្នាំ និងឈ្មោះ កែវ សាវុធ ភេទប្រុស អាយុ ៤៥ឆ្នាំ បានទាស់ពាក្យសម្ដីគ្នា និងឈ្លោះប្រកែកជាមួយអាជីវករឈ្មោះ ហួត ដាវី ដែលលក់ដូរនៅទល់មុខនោះ បង្កឲ្យមានការបាញ់ទឹក និងបាញ់ផ្សែងពន្លត់អគ្គិភ័យ ទៅលើអាជីវករឈ្មោះ ហួត ដាវី ។
ជាមួយគ្នានោះ ក្រុមការងារបានធ្វើកំណត់ហេតុ និងធ្វើការណែនាំដូចខាងក្រោម៖
-ម្ចាស់ទីតាំងឈ្មោះ ប៊ុន វ៉ាន់សៃ និងឈ្មោះ កែវ សាវុធ ត្រូវបញ្ឈប់ការបាញ់ទឹក និងផ្សែងពន្លត់អគ្គិភ័យ ឬធ្វើអ្វីមួយដែលបង្កឲ្យប៉ះពាល់ដល់កតិ្តយស និងសេចក្ដីថ្លៃថ្នូដល់អាជីវករលក់ដូរនៅទល់មុខផ្នែកខាងជើងផ្លូវបន្តទៀតឡើយ និងបងប្អូនប្រជាពលរដ្ឋធ្វើដំណើរតាមផ្លូវសាធារណៈ ដែលធ្វើឲ្យប៉ះពាល់សុខុមាភាពរបស់គាត់ផងដែរ។
-ក្នុងករណីមិនព្រមអនុវត្តតាមការណែនាំរបស់ក្រុមការងារនោះទេ រដ្ឋបាលខណ្ឌនឹងចាត់វិធានរដ្ឋបាល និងនីតិវិធីច្បាប់៕
ដោយ៖ លីហ្សា
