អគ្គិភ័យឆាបឆេះខូចខាតឃ្លាំងទំហំ ៣០០០ម៉ែត្រការ៉េចំនួន ០១ឃ្លាំង រួមទាំងសម្ភារក្នុងឃ្លាំងអស់ទាំងស្រុង នៅខណ្ឌកំបូល

ភ្នំពេញ ៖ នៅព្រឹកថ្ងៃទី១៦ ខែមីនា ឆ្នាំ២០២៥ អង្គភាពស្នងការដ្ឋាននគរបាលរាជធានីភ្នំពេញបានឱ្យដឹងងថា នៅវេលាម៉ោង១៩:៤០នាទីយប់ ថ្ងៃទី១៥ ខែមីនា ឆ្នាំ២០២៥ មានករណីអគ្គិភ័យឆេះនៅចំណុចឃ្លាំងស្តុកនិងកែច្នៃជ័រស្វិត នៅភូមិកប់អំបិល សង្កាត់កំបូល ខណ្ឌកំបូល រាជធានីភ្នំពេញ។

ហេតុការណ៍អគ្គិភ័យឆាបឆេះនេះ សមត្ថកិច្ចកំពុងស្រាវជ្រាវ។ អគ្គិភ័យនេះធ្វើឱ្យឆេះខូចខាតឃ្លាំងទំហំ៣០០០ម៉ែត្រការ៉េចំនួន០១ឃ្លាំង រួមទាំងសម្ភារក្នុងឃ្លាំងអស់ទាំងស្រុង។

នៅវេលាម៉ោង០១:៤០នាទីរំលងអធ្រាត្រ ឈានចូលថ្ងៃទី១៦ ខែ ឆ្នាំដដែល អគ្គិភ័យនេះត្រូវបានពន្លត់បានទាំងស្រុង ដោយប្រើប្រាស់រថយន្តការិយាល័យពន្លត់អគ្គិភ័យរាជធានីភ្នំពេញចំនួន២០គ្រឿង ប្រេីប្រាស់ទឹកអស់ចំនួន១២០ ឡាន ស្មើនឹង៥៥០ម៉ែត្រគូប និងរថយន្តជំនួយរួមមាន: 

-រថយន្តពន្លត់អគ្គិភ័យក្រសួងមហាផ្ទៃ ចំនួន០៤គ្រឿង ប្រើប្រាស់អស់ចំនួន ០៨ឡាន ស្មើនឹង៣២ម៉ែត្រគូប ។ ក្នុងនោះមានរថយន្តពន្លត់អគ្គិភ័យដូចជា ៖ 

-រថយន្តពន្លត់អគ្គិភ័យកងពលតូចលេខ៧០ចំនួន០៦គ្រឿង ប្រើប្រាស់អស់ចំនួន ១៦ឡាន ស្មើនឹង១៦០ម៉ែត្រគូប ។

-រថយន្តពន្លត់អគ្គិភ័យទ័ពពិសេស៩១១ ចំនួន ០២គ្រឿង ប្រើប្រាស់អស់ចំនួន ០៦ឡាន ស្មើនឹង២៤ម៉ែត្រគូប ។

រថយន្តពន្លត់អគ្គិភ័យទីក្រុងកោះពេជ្រ ចំនួន០២គ្រឿង ប្រើប្រាស់អស់ចំនួន ០៦ឡាន ស្មើនឹង ៣៦ម៉ែត្រគូប ។

-រថយន្តពន្លត់អគ្គិភ័យក្រមហ៊ុនស្រាបៀរកម្ពុជា ចំនួន០១គ្រឿង ប្រើប្រាស់អស់ចំនួន ០២ឡាន ស្មើនឹង១២ម៉ែត្រគូប ។

-រថយន្តពន្លត់អគ្គិភ័យទីក្រុងជ្រោយចង្វាចំនួន០៣គ្រឿង ប្រើប្រាស់អស់ចំនួន ០៩ឡាន ស្មើនឹង ៥៤ម៉ែត្រគូប ។

-រថយន្តពន្លត់អគ្គិភ័យបុរីសង្ឃឹមថ្មី ចំនួន០៣គ្រឿង ប្រើប្រាស់អស់ចំនួន ០៦ឡាន ស្មើនឹង ២៤ម៉ែត្រគូប ។

-រថយន្តពន្លត់អគ្គិភ័យសួរឧស្សាហកម្មកាណាឌីយ៉ា ចំនួន០១គ្រឿង ប្រើប្រាស់ទឹកចំនួន ០២ឡាន ស្មើនឹង ១២ម៉ែត្រគូប ។

-រថយន្តពន្លត់អគ្គិភ័យអធិការស្រុកអង្គស្នួល ចំនួន០១គ្រឿង ប្រើប្រាស់អស់ចំនួន ០២ឡាន ស្មើនឹង១២ម៉ែត្រគូប ។

-រថយន្តអគ្គិភ័យរដ្ឋបាលខណ្ឌកំបូល ចំនួន០១គ្រឿង ប្រើប្រាស់ទឹកអស់ចំនួន ០១ឡាន ស្មើនឹង ០៦ម៉ែត្រគូប៕

ដោយ ៖ សិលា