សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ក្រោយពីលាចាកសិក្ខាបទរួចហើយ នារសៀលថ្ងៃនេះ លោកគ្រូ ជួន កក្កដា បានបង្ហោះសារលើបណ្តាញសង្គមហ្វេសប៊ុកលោកគ្រូថា ៖ ទូលបង្គំខ្ញុំព្រះករុណាខ្ញុំបាទ សូមក្រាបថ្វាយបង្គំសម្តេចជាអម្ចាស់ និងព្រះកុរណាលោកម្ចាស់គ្រប់ព្រះអង្គជាទីគោរពសក្ការៈ និងគោរពជំរាបសួរសម្តេច ទ្រង់ ឯកឧត្តម លោកជំទាវ លោកឧកញ៉ា លោក លោកស្រី និងញាតិញោមពុទ្ធបរិស័ទទាំងក្នុងនិងក្រៅប្រទេស ។ ខ្ញុំព្រះករុណាខ្ញុំបាទ ថ្លែងអំណរព្រះគុណនិងអរគុណចំពោះទឹកចិត្តស្រលាញ់រាប់អាន ជូនពរដល់រូបខ្ញុំព្រះករុណាខ្ញុំបាទ សម្រាប់ដំណេីរជីវិតថ្មីនេះ។
លោកគ្រូ ជួន កក្កដា បន្តថា ៖ សូមទទួលការគោរពរាប់អានពីខ្ញុំព្រះករុណាខ្ញុំបាទ ឧបាសក ជួន កក្កដា ។
ជុំវិញបញ្ហានេះ ! ស្រ្តីទី១កម្ពុជា ឧត្តមភរិយា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា គឺលោកស្រីបណ្ឌិត ពេជ ចន្ទមុន្នី បានបង្ហោះលើផេកផ្លូវការថា ៖ ទោះព្រះតេជគុណ ជួន កក្កដា «អស់បុណ្យជាព្រះសង្ឃ»លាចាកសិក្ខាបទ ក៏សង្ឃឹមថាបន្តផ្តល់ការអប់រំយុវជន យុវតីជំនាន់ក្រោយអោយមាន សីលធម៌ សុជីវធម៌ មេត្តាធម៌ និងគុណធម៌ ។
លោកស្រីបណ្ឌិត ពេជ ចន្ទមុន្នី ហ៊ុន ម៉ាណែត មានប្រសាសន៍ថា ៖ នាងខ្ញុំចូលចិត្តស្តាប់ធម្មទេសនារបស់ព្រះអង្គសូម អរព្រះគុណ និងអរគុណណាស់លោកប្អូន ដែលបានចំណាយពេលវេលា កម្លាំងកាយ កម្លាំងចិត្ត ជួយដល់ព្រះពុទ្ធសាសនានៅកម្ពុជាកន្លងមកនេះ ជួយក្នុងការអប់រំតាមរយៈឱវាទរបស់ព្រះពុទ្ធ🙏។ បន្ទាប់ពីពេលនេះទៅទោះបីលោកប្អូនក្លាយជាគ្រហស្ថ ក៏ខ្ញុំនៅតែសង្ឃឹមថាលោកប្អូននៅតែជួយដល់ព្រះពុទ្ធសាសនាបំពេញកាតព្វកិច្ចក្នុងនាមជាពលរដ្ឋ ជួយដល់សង្គមកម្ពុជា ជាពិសេសគឺការអប់រំយុវជន យុវតីជំនាន់ក្រោយអោយមាន សីលធម៌ សុជីវធម៌ មេត្តាធម៌ និងគុណធម៌។ សូមជូនពរលោកប្អូនអោយមានសំណាងល្អក្នុងភាពជាគ្រហស្ថ☺️។
សូមបញ្ជាក់ថា ៖ ជាង២៧ព្រះវស្សា ក្នុងវិស័យព្រះពុទ្ធសាសនា ព្រះតេជគុណ ជួន កក្កដា ព្រះវិន័យធរគណខេត្តតាកែវ និងជាព្រឹទ្ធបុរសរងនៃពុទ្ធិកសកលវិទ្យាល័យព្រះសីហនុរាជ នាយកសាលាពុទ្ធិកនាងខ្មៅ សម្រេចលាចាកសិក្ខាបទ ក្រោមហេតុផល «អស់បុណ្យជាព្រះសង្ឃ»។ ព្រះអង្គ លាចាកសិក្ខាបទ នៅព្រឹកថ្ងៃទី១៩ មីនា ឆ្នាំ២០២៥ នេះ ។
«អស់បុណ្យជាព្រះសង្ឃ»។ នេះជាហេតុផលរបស់ព្រះអង្គ ជួន កក្កដា ដែលមានសង្ឃដីការពន្យល់ទៅកាន់ពុទ្ធបរិស័ទ្ធ ប្រជាពលរដ្ឋ ដែលតែងតែគោរពប្រតិបត្តិ និងចូលចិត្តស្ដាប់ធម៌វិន័យរបស់ព្រះអង្គ នៅក្នុងវីដេអូជិត១២នាទី។
សូមបញ្ជាក់ថា ៖ «ការលាចាកភ្នួសរបស់ព្រះតេជគុណនាំឱ្យមានការសោកស្តាយធនធានសង្ឃក្នុងវិស័យព្រះពុទ្ធសាសនា »៕
ដោយ ៖ សិលា
