សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង ៖ បុរសបែកថ្នាំម្នាក់ត្រូវបានកម្លាំងកងរាជអាវុធហត្ថស្រុកភ្នំព្រឹកចាប់ឃាត់ខ្លួន ក្រោយពីយកកាំបិតចាប់អារ.កនាយិកាសាលាបឋមសិក្សាម្នាក់បណ្ដាលឲ្យរងរបួសធ្ងន់ កាលពីវេលាម៉ោងជាង១២អាធ្រាត្រ ឈានចូលថ្ងៃទី២៤ ខែមីនា នៅភូមិក្រួសក្រហម ឃុំអូររំដូល ស្រុកភ្នំព្រឹក ខណៈដែលជនរងគ្រោះកំពុងអង្គុយលេងនៅក្រោមផ្ទះនៅឡើយ។
សេចក្ដីរាយការណ៍បានឲ្យដឹងថា ជនដៃដល់នោះឈ្មោះ សាញ់ ចាន់ថន ហៅ ធិ ភេទប្រុស អាយុ២២ឆ្នាំ រស់នៅភូមិ ឃុំខាងលើ (ជនបែកថ្នាំ)។ រីឯជនរងគ្រោះឈ្មោះ ក្រូច សុខមឿន អាយុ៥២ឆ្នាំ ជានាយិកាសាលបឋមសិក្សា«ក្រួសក្រហម» រស់នៅភូមិ ឃុំកើតហេតុ។
សេចក្ដីរាយការណ៍បានឲ្យដឹងទៀតថា ជនបែកថ្នាំនោះត្រូវបានកម្លាំងមូលដ្ឋានកងរាជអាវុធហត្ថស្រុកភ្នំព្រឹកឃាត់ខ្លួន ក្រោយធ្វើឃាតជនរងគ្រោះមិនបានសម្រេច។ គេមិនបានរាយការណ៍ពិស្ដារអំពីដើមចមដែលនាំឲ្យមានរឿងនេះកើតឡើងរវាងជនបែកថ្នាំ ជាមួយអ្នកស្រី នាយិកាសាលានោះទេ។ ប៉ុន្តែប្រភពព័ត៏មានបានប្រាប់ថា នៅពេលកើតហេតុ វេលារំលងអធ្រាត្របន្តិចទៅហើយ អ្នកគ្រូ ក្រូច សុខមឿង កំពុងអង្គុយលេងនៅក្រោមផ្ទះ ហើយមិនបានដឹងរឿងអ្វីសោះ ស្រាប់តែជនបែកថ្នាំនោះ លបចូលទៅចាប់គាត់«អារ.ក»តែម្ដង។ ប៉ុន្តែសំណាងល្អគាត់រើបម្រះរួច តែយ៉ាងណាបានធ្វើឲ្យគាត់រងរបួសត្រង់បំពង់កធ្ងន់ធ្ងរគួរសម ហើយត្រូវបានសាច់ញតិបញ្ជូនភ្លាមៗ ទៅសង្គ្រោះនៅមណ្ឌលសុខភាពទាំងយប់។
មន្ត្រីកងរាជអាវុធហត្ថ បាននិយាយថា ជនដៃដល់ជាមនុស្សប្រើប្រាសថ្នាំញៀន ឡើងជោកជាំ(បែកថ្នាំ)។ ជននេះបានប្រើប្រាស់កូនបិតចិតបន្លែ «អារក» នាយិកាខាងលើ ធ្វើឲ្យគាត់រងរបួសយ៉ាងដំណំ។ ពេលនេះជនដៃដល់បាននិងកំពុងកងរាជអាវុធហត្ថសួរនាំ ហើយនឹងបញ្ជនទៅកាន់សាលាដំបូងខេត្តចាត់ការតាមនីតិវិធី ក្រោយបញ្ចប់ការសាកសួរ៕
ដោយ៖ សូរិយា
