សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ ក្រុមប្រឹក្សាអភិវឌ្ឍន៍កម្ពុជា នៅព្រឹកថ្ងៃព្រហស្បតិ៍ទី២៧ ខែមីនា ឆ្នាំ២០២៥នេះ បានឱ្យដឹងថា ដំណើរទស្សនកិច្ចសិក្សារបស់លេខាធិការដ្ឋានដឹកនាំ និងសម្របសម្រួលការអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជា នៃក្រុមប្រឹក្សាអភិវឌ្ឍន៍កម្ពុជា ទៅកាន់ក្រុមហ៊ុនក្នុងវិស័យយានយន្ត និងអេឡិចត្រូនិក។
ជាក់ស្ដែងលេខាធិការដ្ឋានដឹកនាំ និងសម្របសម្រួលការអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជា (IDP) ដឹកនាំដោយ លោក អ៊ឹម សួរ អគ្គលេខាធិការងគណៈកម្មាធិការសហប្រតិបត្តិការអភិវឌ្ឍន៍កម្ពុជា នៃក្រុមប្រឹក្សាអភិវឌ្ឍន៍កម្ពុជា កាលពីម្សិលមិញនេះ បានចុះទស្សនកិច្ចសិក្សាទៅកាន់ក្រុមហ៊ុនក្នុងវិស័យយានយន្ត និងអេឡិចត្រូនិកដែលមានទីតាំងនៅខេត្តស្វាយរៀងចំនួន ៣ រួមមាន៖ ១) ក្រុមហ៊ុន Ozmech Machinery Co., Ltd. ផលិតធុងទឹករថយន្តគ្រប់ប្រភេទ, ២) ក្រុមហ៊ុន CLEVERWISE ELECTRIC (CAMBODIA) Co., Ltd. ផលិតគ្រឿងបង្គុំអំពូលភ្លើង, និង ៣) ក្រុមហ៊ុន T.Y ELECTRIC Co., Ltd., ផលិតអំពូលភ្លើងលម្អរគ្រប់ប្រភេទ។
ប្រភពដដែលបន្តថា គោលបំណងនៃការចុះទស្សនកិច្ចនេះគឺដើម្បីយល់ដឹងពីប្រតិបត្តិការ ខ្សែច្រវាក់ផលិតកម្ម បញ្ហាប្រឈម និងសំណូមពររបស់ក្រុមហ៊ុនក្នុងវិស័យទាំង២នេះ ដើម្បីជាធាតុចូលសម្រាប់ការរៀបចំរបាយការណ៍វាយតម្លៃវឌ្ឍនភាព ២ឆ្នាំ (២០២៣-២០២៤) នៃការអនុវត្តផែនទីបង្ហាញផ្លូវការអភិវឌ្ឍវិស័យយានយន្ត និងអេឡិចត្រូនិកកម្ពុជា។
ក្រុមប្រឹក្សាអភិវឌ្ឍន៍កម្ពុជា បានបន្តថា ជារួម ក្រុមហ៊ុនទាំង៣ បានបង្ហាញភាពជោគជ័យក្នុងការវិនិយោគនៅកម្ពុជា និងវាយតម្លៃខ្ពស់លើកិច្ចខិតខំប្រឹងប្រែង និងការយកចិត្តទុកដាក់របស់រាជរដ្ឋាភិបាលកម្ពុជា ក្នុងការផ្តល់កិច្ចសម្រួលវិនិយោគជូនវិនិយោគិនកន្លងមក៕
ដោយ៖ តារា
