សារព័ត៌មាន នគរវត្ត តែងតែនាំមុខគេជានិច្ច
រដ្ឋាភិបាលយោធាមីយ៉ាន់ម៉ា អំពាវនាវរកជំនួយមនុស្សធម៌អន្តរជាតិ ដើម្បីជួយដល់កិច្ចខិតខំប្រឹងប្រែងសង្គ្រោះក្រោយគ្រោះរញ្ជួយដី។ ការងារគាំទ្របច្ចុប្បន្នកំពុងប្រឈមមុខនឹងការលំបាកជាច្រើនដោយសារការខូចខាតយ៉ាងធ្ងន់ធ្ងរដល់ហេដ្ឋារចនាសម្ព័ន្ធថាមពល និងទំនាក់ទំនង។យោងតាម AFP នៅរសៀលថ្ងៃទី ២៨ ខែមីនា រដ្ឋាភិបាលយោធាមីយ៉ាន់ម៉ា (ជាពេលវេលាដ៏កម្រមួយ) បានអំពាវនាវដល់សហគមន៍អន្តរជាតិឱ្យផ្តល់ជំនួយមនុស្សធម៌ដល់ប្រទេសនេះ បន្ទាប់ពីទទួលរងការរញ្ជួយដីពីរដងដែលមានកម្រិត ៧,៧ រ៉ិចទ័រនៅរសៀលថ្ងៃដដែលនោះ។
អ្នកនាំពាក្យរដ្ឋាភិបាលយោធាលោក Zaw Min Tun បាននិយាយថា “យើងចង់ឱ្យសហគមន៍អន្តរជាតិបញ្ជូនជំនួយមនុស្សធម៌ឱ្យបានឆាប់តាមដែលអាចធ្វើទៅបាន” ។
រដ្ឋាភិបាលយោធាបានប្រកាសដាក់ប្រទេសក្នុងភាពអាសន្នដោយសារតែគ្រោះមហន្តរាយធម្មជាតិនៅក្នុងតំបន់ចំនួនប្រាំមួយ រួមមាន Sagaing, Mandalay, Magway, Bago, Shan State និងរដ្ឋធានី Naypyidaw។
នារសៀលថ្ងៃទី២៨ ខែមីនា នាយឧត្តមសេនីយ៍ Min Aung Hlaing ប្រមុខរដ្ឋាភិបាលយោធា បានចុះពិនិត្យ និងសួរសុខទុក្ខអ្នកជំងឺនៅមន្ទីរពេទ្យទូទៅ Naypyidaw។
មកទល់ពេលនេះ មិនទាន់មានរបាយការណ៍ជាក់លាក់ណាមួយ ស្តីពីការស្លាប់និងរងរបួស ក៏ដូចជាការខូចខាតនៅឡើយទេ។ ប៉ុន្តែតាមការសន្និដ្ឋាន មានអ្នកស្លាប់ជាច្រើន ដោយសារតែការបាក់រលំអគារ៕
ដោយ៖ ធីរីណា(រូបថត៖ AFP)
