ស្ត្រីវ័យចំណាស់ដេកស្លាប់នៅក្រោមស្ពានអាកាសក្បាលថ្នល់បង្កការភ្ញាក់ផ្អើលទាំងព្រឹក

ភ្នំពេញ៖ ស្ត្រីវ័យចំណាស់ម្នាក់មានអាយុជាង៧០ឆ្នាំ ត្រូវបានប្រជាពលរដ្ឋប្រទះឃើញដេកស្លាប់តែម្នាក់ឯងគ្មានញាតិមិត្តនៅក្បែរ បង្កការភ្ញាក់ផ្អើលទាំងព្រឹក ។

ហេតុការណ៍នេះកើតឡើងនៅព្រឹកថ្ងៃទី8កញ្ញាឆ្នាំ2016 នៅក្រោមស្ពានអាកាសក្បាលថ្នល់ត្រៀយខាងលិច ស្ថិតក្នុងសង្កាត់ចាក់អង្រែលើ ខណ្ឌមានជ័យ ។

ពុំមានសាក្សីណាម្នាក់ដឹងថាលោកយាយម្នាក់នេះមានឈ្មោះអ្វី? មានទីលំនៅនៅឯណា ?ស្លាប់ដោយសារអ្វី និងហេតុអ្វីបានជា មកដេកស្លាប់នៅក្រោមស្ពានយ៉ាងអភ័ព្វបែបនេះឡើយ ។
ប៉ុន្តែបើតាមបុរសអ្នករត់ម៉ូតូឌុបម្នាក់បាននិយាយថា កាលពីអំឡុងម៉ោង១១យប់ ថ្ងៃទី៧ខែ កញ្ញា ឆ្នាំ២០១៦ គាត់បានឃើញស្រី្តរូបនេះត្រូវបានបុរសម្នាក់ដឹកតាមរ៉ឺម៉កម៉ូតូមកទម្លាក់ ចោលនៅក្រោមស្ពានក្បាលថ្នល់ ហើយបើករ៉ឺម៉កម៉ូតូចេញបាត់ទៅ ដោយទុកឲ្យគាត់នៅដេក ថ្ងូរតែម្នាក់ឯងលើកន្ទេល និងមានភួយមួយដណ្តប់តែប៉ុណ្ណោះ ។

បុរសនេះបានឲ្យដឹងទៀតហើយ ស្រី្តរូបនេះសង្ស័យជាអ្នកក្រីក្រមកពីខេត្តឆ្ងាយ ហើយ មានជំងឺប្រចាំកាយមកដេកពេទ្យនៅភ្នំពេញព្យាបាលមិនជា ទើបគេដឹកមកទម្លាក់ចោលនៅក្រោមស្ពានយ៉ងនេះ ។
បន្ទាប់ពីមានការភ្ញាក់ផ្អើលក្នុងករណីនេះ សមត្ថកិច្ចមូលដ្ឋានបានទៅដលដឹក សាកសពយកទៅតម្កល់នៅវត្តចាក់អង្រែក្រោមដើម្បីរង់ចាំសាច់ញាតិយកទៅធ្វើបុណ្យតាមប្រពៃណី ៕ ប្រាថ្នា