សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាលៈ ជនសង្ស័យជាមេក្លោងជួញដូរគ្រឿងញៀន៣នាក់ ត្រូវបានសមត្ថកិច្ចនគរបាលស្រុកកណ្តាលស្ទឹង ស្រាវជ្រាវបង្រ្កាបឃាត់ខ្លួន រួមជាមួយថ្នាំញៀនប្រភេទមេតំហ្វេតាមីនចំនួន០៤កញ្ចប់ធំ ជញ្ជីងថ្លឹងគ្រឿងញៀនចំនួន០២គ្រឿង រថយន្តកាមរីបាឡែន០១គ្រឿង និងវត្ថុតាងពាក់ព័ន្ធមួយចំនួនទៀត ដើម្បីកសាងសំណុំរឿងបញ្ជូនទៅកាន់សាលាដំបូងខេត្តកណ្តាលចាត់ការតាមនីតិវិធីច្បាប់ ។
ប្រតិបត្តិការបង្រ្កាបឃាត់ខ្លួនមេក្លោងជួញដូរគ្រឿងញៀនខាងលើនេះធ្វើឡើង កាលពីវេលាម៉ោង១៧និង៤០នាទី ថ្ងៃទី១១ ខែកញ្ញា ឆ្នាំ២០១៦ ស្ថិតក្នុងភូមិកំពង់តាឡុង ឃុំបឹងខ្យាងស្រុកកណ្តាលស្ទឹង ខេត្តកណ្តាល ។
មន្ត្រីនគរបាលស្រុកកណ្តាលស្ទឹងបានឲ្យដឹងថា មេក្លោងជួញដូរគ្រឿងញៀនដែលត្រូវបានចាប់ខ្លួននោះ ទី១-ឈ្មោះ ហុង លាងហេង ភេទប្រុស អាយុ២៥ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅភូមិព្រៃតាតូច ឃុំបឹងខ្យាង ស្រុកកណ្តាលស្ទឹង ទី២-ឈ្មោះ ប៉ិច ភារុន ភេទប្រុស អាយុ២៨ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅភូមិកំពង់តាឡុង ឃុំបឹងខ្យាង ស្រុកកណ្តាលស្ទឺង ទី៣-ឈ្មោះ ម៉ៅ លីអយ ភេទប្រុស អាយុ២០ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅភូមិពត់ស ឃុំពត់ស ស្រុកបាទី ខេត្តតាកែវ ។
ប្រភពដដែលបានបន្តថា ក្នុងប្រតិបត្តិការនេះ សមត្ថកិច្ចបានធ្វើការរឹបអូសវត្ថុតាងរួមមាន៖ ថ្នាំញៀនប្រភេទមេតំហ្វេតាមីនចំនួន០៤កញ្ចប់ធំ, ជញ្ជីងថ្លឹងគ្រឿងញៀនចំនួន០២គ្រឿង រថយន្តកាមរីបាឡែន០១គ្រឿង ពណ៌ទឹកប្រាក់ ពាក់ស្លាកលេខភ្នំពេញ2AK-5080, ទូរស័ព្ទដៃ០៤គ្រឿង, សម្ភារៈសម្រាប់វេចខ្ចប់គ្រឿងញៀន និងឧបករណ៍សម្រាប់សេពគ្រឿងញៀនមួយចំនួនទៀត ។
ប្រភពដដែលបានបន្តថា ជនល្មើសទាំង៣នាក់នេះជាមុខសញ្ញាជួញដូរគ្រឿងញៀនដ៏សកម្ម ដែលត្រូវសមត្ថកិច្ចកំណត់និងតាមដាននាពេលកន្លងមក ។ លុះមកដល់ថ្ងៃទី១១ ខែកញ្ញា ឆ្នាំ២០១៦ សមត្ថកិច្ចនគរបាលទទួលបានព័ត៌មានថា ជនល្មើសទាំង៣នាក់នេះមានរក្សាទុកគ្រឿងញៀននៅជាប់ខ្លួន ដើម្បីធ្វើសកម្មភាពជួញដូរ ទើបសមត្ថកិច្ចដាក់កម្លាំងចាំឃ្លាំមើលរហូតឈានដល់ធ្វើការឃាត់ខ្លួនរួមជាមួយវត្ថុតាងពាក់ព័ន្ធ ដើម្បីកសាងសំណុំរឿងបញ្ជូនទៅកាន់សាលាដំបូងខេត្តកណ្តាលចាត់ការតាមនីតិវិធីច្បាប់ ៕ស្អាងជ័យ
