រដ្ឋាភិបាលក្នុងតំបន់ជាច្រើននៃប្រទេសកូរ៉េខាងត្បូងផ្តល់លុយដល់អ្នករៀបការ

ចែករំលែក៖

រដ្ឋាភិបាលក្នុងតំបន់ជាច្រើននៅក្នុងប្រទេសកូរ៉េខាងត្បូងផ្តល់ការលើកទឹកចិត្តជាសាច់ប្រាក់ដល់គូស្នេហ៍រៀបអាពាហ៍ពិពាហ៍ ដូចជាប្រាក់ឧបត្ថម្ភសម្រាប់ការណាត់ជួបនិងការចំណាយក្រេបទឹកឃ្មុំជាដើម។
រដ្ឋាភិបាលស្រុក Saha នៅទីក្រុង Busan បានដាក់ចេញនូវគោលនយោបាយផ្តល់ប្រាក់រហូតដល់ 20 លានវ៉ុន (14,700 ដុល្លារ) សម្រាប់ជំនួយដល់គូស្វាមីភរិយាដែលបានរៀបការបន្ទាប់ពីបានចូលរួមក្នុងព្រឹត្តិការណ៍ផ្គូផ្គងដែលរៀបចំដោយស្រុក។ លើសពីនេះទៀត ពួកគេត្រូវបានគាំទ្រជាមួយនឹងថ្លៃណាត់ជួបចំនួន 500,000 វ៉ុន (365 ដុល្លារ) ការចំណាយលើការភ្ជាប់ពាក្យចំនួន 1 លានវ៉ុន និងប្រាក់ឧបត្ថម្ភធ្វើដំណើរចំនួន10លានវ៉ុន (7,300 ដុល្លារ) ។
មន្ត្រីស្រុកម្នាក់បាននិយាយថា “កម្មវិធីនេះជាផ្នែកមួយនៃគោលនយោបាយប្រជាជនរបស់យើងដើម្បីដោះស្រាយវិបត្តិនៃអត្រាកំណើតទាប និងការថយចុះចំនួនប្រជាជននៅក្នុងតំបន់” ដោយបន្ថែមថាគ្មានគូស្វាមីភរិយាណាមួយបានទទួលប្រាក់ឧបត្ថម្ភទាំងអស់នោះទេ។
ទីក្រុងផ្សេងទៀតក៏កំពុងដាក់ចេញនូវគំនិតផ្តួចផ្តើមស្រដៀងគ្នានេះផងដែរ។ នៅក្នុងទីក្រុង Geochang ខេត្ត South Gyeongsang គូស្វាមីភរិយាថ្មីថ្មោងដែលមានអាយុពី 19-45 ឆ្នាំដែលបានរស់នៅក្នុងទីក្រុងនេះលើសពីបីខែនឹងទទួលបានប្រាក់ឧបត្ថម្ភចំនួន 600,000 វ៉ុនក្នុងមួយឆ្នាំសម្រាប់រយៈពេល 3 ឆ្នាំ។
រដ្ឋាភិបាលទីក្រុង Hadong នៅក្នុងខេត្តតែមួយទើបតែបានបង្កើនការលើកទឹកចិត្តអាពាហ៍ពិពាហ៍ពី 5 លានទៅ 6 លានវ៉ុន (4,400 ដុល្លារ) ។ ស្រុក និងទីក្រុងមួយចំនួនទៀត រួមទាំង Goseong, Uiryeong និង Miryang ក៏មានគោលនយោបាយឧបត្ថម្ភធនអាពាហ៍ពិពាហ៍ចំនួន 1-2 លានវ៉ុនផងដែរ៕ ដោយ៖ ធីរីណា