សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ ៖ យុវជន២នាក់ដើរពេលយប់ ត្រូវក្មេងទំនើង១ក្រុមមានគ្នា៤នាក់យកដុំថ្មគប់ចំកណ្តាលទ្រូងបណ្តាលឱ្យស្លាប់ម្នាក់ភ្លាមៗនៅនឹងកន្លែងកាលពីយប់ថ្ងៃទី៣០ ខែឧសភា ឆ្នាំ២០២៥ក្នុងភូមិដូនមូល ឃុំរហាត់ទឹក ស្រុកមង្គលបូរី ខេត្តបន្ទាយមានជ័យ ។
លោកវរសេនីយ៍ទោ ឌី ទាវ អធិការនគរបាលស្រុកមង្គលបូរីបានឱ្យដឹងថា ជនរងគ្រោះឈ្មោះ ប៉ុក សុខនី ភេទប្រុស អាយុ១៥ឆ្នាំ រស់នៅភូមិកើតហេតុខាងលើ។
លោកបានបញ្ជាក់ថា យុវជន២នាក់ដើរពេលយប់ត្រឡប់ទៅផ្ទះ ស្រាប់តែមានក្មេងទំនើង១ក្រុមជិះម៉ូតូ៣គ្រឿងមានគ្នា៤នាក់ បានយកដុំថ្មគប់ទៅលើជនរងគ្រោះដែលកំពុងដើរថ្មើរជើងតាមផ្លូវបណ្តាលឱ្យត្រូវម្នាក់រត់បាន២០ម៉ែត្រដួលសន្លប់បាត់មាត់បាត់ក ចំណែកក្មេងទំនើងបានបើកម៉ូតូគេចខ្លួនអស់ ។ ដោយឡែកមិត្តភក្តិដែលដើរជាមួយជនរងគ្រោះរត់ទៅគ្រាហ៍ជនរងគ្រោះ និងស្រែកឱ្យអ្នកជិតខាងជួយ លុះពេលអ្នកជិតខាងចេញមកមើល ជនរងគ្រោះបានដាច់ខ្យល់ស្លាប់បាត់ទៅហើយ ។
លោកវរសេនីយ៍ទោ ឌី ទាវ បានបញ្ជាក់ថា ក្រោយទទួលបានព័ត៌មាននេះ អាជ្ញាធរនិងកម្លាំងប៉ុស្តិ៍នគនរបាលរហាត់ទឹកបានចេញទៅដល់ តែក្មេងទំនើងដែលបង្កហេតុបានគេចខ្លួនបាត់អស់ នៅសល់តែជនរងគ្រោះ ។
ក្រោយកម្លាំងជំនាញអធិការដ្ឋាននគរបាលស្រុកមង្គលបូរីទៅដល់ពិនិត្យជនរងគ្រោះបានស្លាប់ដោយត្រូវដុំថ្មគប់ចំទ្រូងបណ្តាលឱ្យស្លាប់ភ្លាមៗ និងប្រគល់សាកសពយុវជនរងគ្រោះជូនសាច់ញាតិយកទៅធ្វើបុណ្យ ហើយកម្លាំងជំនាញបានធ្វើការស្រាវជ្រាវរហូតឃាត់ខ្លួនជនសង្ស័យបាន៣នាក់នាំយកមកសាកសួរនិងអនុវត្តតាមនីតិវិធីនិងស្រាវជ្រាវតាមចាប់ខ្លួនជនជនសង្ស័យបន្តដើម្បីអនុវត្តតាមច្បាប់ ៕
ដោយ៖ សូរិយា
