សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ យ៉ាងហោចណាស់បុរសម្នាក់បានស្លាប់ភ្លាមៗនៅនឹងកន្លែង ចំណែកនារីម្នាក់ទៀត រងរបួសធ្ងន់ បាក់ជើងម្ខាង បន្ទាប់ពីជួបហេតុការណ៍គ្រោះថ្នាក់ចរាចរណ៍ ដោយសាររថយន្តបែនដឹកខ្សាច់ បើកបុកមូ៉តូ កាលពីវេលាម៉ោង៤និង៣០នាទីរសៀល ថ្ងៃទី២៤ ខែកញ្ញា ឆ្នាំ២០១៦ ស្ថិតនៅភូមិព្រៃកី សង្កាត់ភ្លើងឆេះរទេះ ខណ្ឌពោធិសែនជ័យ ។
ជនរងគ្រោះ ស្លាប់នៅកន្លែង មានឈ្មោះ នឹម បុ៊នលី ភេទប្រុស អាយុ២៥ឆ្នាំ មុខរបរ កម្មកររោងចក្រ ចំណែក នារីម្នាក់ទៀតរងរបួសធ្ងន់ ត្រូវជាបងប្អូននឹងគ្នា មានឈ្មោះ ឃិត ចាន់រី អាយុ១៨ឆ្នាំ មុខរបរកម្មកររោងចក្រ ទាំង២នាក់ស្នាក់នៅផ្ទះជួលភូមិព្រៃទា សង្កាត់ចោមខៅ មានស្រុកកំណើត ភូមិក្រាំងកណ្តាល ឃុំ ស្នំក្រពើ ស្រុកគងពិសី ខេត្តកំពង់ស្ពឺ ។
តាមប្រភពនីកន្លែងកើតហេតុបានឲ្យដឹងថា មុនកើតហេតុជនរងគ្រោះជិះម៉ូតូមួយគ្រឿងម៉ាកហុងដា សេ១២៥ សេរី២០១៥ ពណ៌ខ្មៅ ពាក់ស្លាកលេខ ភ្នំពេញ 1FC-2130 ពីជើងទៅត្បូង លុះដល់ខំណុចកើតហេតុ ស្រាប់តែរថយន្តបង្កបើកពីត្បូងទៅជើងជ្រុលមកបុក បណ្តាលឲ្យស្លាប់ម្នាក់ របួសធ្ងន់ម្នាក់ ក្រោយកើតហេតុរថយន្តបង្កបើកគេចទៅបាត់ ។
ក្រោយពេលកើតហេតុសមត្ថកិច្ចបានចុះមកដល់ចំណុចកើតពិនិត្យជាក់ស្តែកនិងទំនាក់ទំនងក្រុមគ្រួសារ ដឹកយកទៅធ្វើបុណ្យតាមប្រពៃណី រីឯនារីរងគ្រោះម្នាក់ទៀត ត្រូវបានរថយន្តសង្រ្គោះ ដឹកបញ្ជូនទៅមន្ទីរពេទ្យព្រះកុសុមះ ៕ សុខាសែនជ័យ
