សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ ៖ យុវជន២នាក់ មានទំនាស់ពាក្យសម្តីនិងគ្នានៅក្នុងវង់ផឹកស៊ីជនដៃដល់ម្នាក់យកកាំបិតកាប់បុរសម្នាក់ទៀតចំក្បាលបណ្ដាលឲ្យរងរបួសធ្ងន់ត្រូវបានគេបញ្ជូនទៅមន្ទីរពេទ្យដើម្បីជួយ សង្គ្រោះ រីឯជនដៃដល់សមត្ថកិច្ចឃាត់ខ្លួនបញ្ជូនទៅតុលាការដើម្បីចាត់ការតាមផ្លូវ ច្បាប់។ ករណីប្រើអំពើដោយចេតនានេះ បានកើតឡើងកាលពីវេលាម៉ោង៧យប់ ថ្ងៃទី២៤ ខែកញ្ញា ឆ្នាំ២០១៦ ស្ថិតនៅ ភូមិម៉ក់ហឺន ឃុំកូប ស្រុកអូរជ្រៅ ខេត្ត បន្ទាយមានជ័យ។
មន្ត្រីអាវុធហត្ថក្រុងប៉ោយប៉ែតបានឲ្យដឹងថា ជនសង្ស័យដែលសមត្ថកិច្ចឃាត់ ខ្លួនឈ្មោះ ឃុន ជី អាយុ២៥ឆ្នាំ រស់នៅ ក្នុងភូមិ-ឃុំ កើតហេតុខាងលើ។ ចំណែក ជនរងគ្រោះសមត្ថកិច្ចមិនទាន់ស្គាល់អត្តសញ្ញាណណនៅឡើយទេត្រូវបានគេបញ្ជូនទៅមន្ទីរពេទ្យបង្អែកខេត្តដើម្បីជួយ សង្គ្រោះ។
តាមសាក្សីនៅកន្លែងកើតហេតុបាន បញ្ជាក់ថា នៅមុនពេលកើតហេតុមាន បុរស៣-៤នាក់បាននាំគ្នាផឹកស៊ីគ្រានោះ ពួកគេបាននិយាយគ្នាលេង លុះដល់ពេលកើតហេតុស្រាប់តែមានបុរស២នាក់បានទាស់ពាក្យសម្តីគ្នាហើយបុរសម្នាក់បានទាញយក កាំបិតបុ័ងតោមកកាប់បុរសម្នាក់ទៀតចំក្បាលបណ្តាលឲ្យរបួសធ្ងន់ត្រូវបានគេបញ្ជូនទៅសង្គ្រោះនៅមន្ទីរពេទ្យបង្អែក ខេត្តតែម្តង។ រីឯជនដៃដល់ត្រូវបានសមត្ថកិច្ចតាមចាប់ខ្លួនបាននៅវេលាម៉ោង៤ទៀបភ្លឺថ្ងៃទី២៥ ខែកញ្ញា ឆ្នាំ២០១៦ ខណៈ ជនដៃដល់ព្យាយាមរត់គេចខ្លួនបន្ទាប់ពីជនរងគ្រោះបានដាក់ពាក្យបណ្តឹងទៅសមត្ថកិច្ច។
បច្ចុប្បន្នជនសង្ស័យខាងលើត្រូវបានសមត្ថកិច្ចឃាត់ខ្លួនបញ្ជូនទៅមូលដ្ឋានកងរាជអាវុធហត្ថក្រុងប៉ោយប៉ែតកសាង សំណុំរឿងបញ្ជូនទៅសាលាដំបូងខេត្តដើម្បីចាត់ការតាមនីតិវិធី៕ សំ វិចិ្ឆកា
