សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ បុរសភ្នែករូងម្នាក់ ត្រូវបានគេនិយាយថា ជិះម៉ូតូធុនធំ០១គ្រឿង មកពីរាជធានីភ្នំពេញ ទំនងយកគ្រឿងញៀនទៅលក់ឲ្យទណ្ឌិតម្នាក់នៅមណ្ឌលកែប្រែអប់រំស្រុកភ្នំក្រវាញ ប៉ុន្តែត្រូវបានជាប់អន្ទាក់របស់សមត្ថកិច្ចនៅលើស្ពានដែកបាឡេសម្ដេចនាយករដ្ឋមន្រ្តី ។
ហេតុការណ៍នេះ បានកើតឡើងកាលពីវេលាម៉ោង៣និង៥០នាទីរសៀល ថ្ងៃទី០៤ ខែតុលា ឆ្នាំ២០១៦ ត្រង់ចំណុចលើស្ពានដែកបាឡេសម្ដេចនាយករដ្ឋមន្រ្តី ស្ថិតក្នុងភូមិបោះពួយ ឃុំលាច ស្រុកភ្នំក្រវាញ ខេត្តពោធិ៍សាត់ ។
ប្រភពព័ត៌មានពីសមត្តកិច្ចស្រុកភ្នំក្រវាញបានឲ្យដឹងថា ជនសង្ស័យ រួមទាំងវត្ថុតាង និងសម្ភារត្រូវបានកំលាំងឃាត់ចាប់ឈ្មោះ ហុក សារ៉ាន់ ភេទប្រុស អាយុ ២៤ឆ្នាំ បច្ចុប្បន្នរស់នៅភូមិឡកំបោរ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ ។
ប្រភពបន្តថា ក្នុងកិច្ចប្រតិបត្តិការណ៍ខាងលើនេះដែរ កំលាំងបានដកហូតនូវវត្ថុតាងសារធាតុញៀនប្រភេទម្សៅក្រាមពណ៌សថ្លាចំនួន០៧កញ្ចប់ និងសម្ភារម៉ូតូម៉ាក SL ពណ៌ស ពាក់ស្លាកលេខ ភ្នំពេញ 1AQ 9581 ។
ប្រភពបន្តទៀតថា មុខសញ្ញាចែកចាយដោយខុសច្បាប់នូវសាធាតុញៀន ត្រូវបានកម្លាំងឃាត់ចាប់ខាងលើនេះ គេយកទៅឲ្យទណ្ឌិតម្នាក់ឈ្មោះ ខែម កុសល ហៅឡុង ភេទប្រុស អាយុ ៣៩ឆ្នាំ ប៉ុន្តែគេមិនបានបញ្ជាក់អំពីទណ្ឌិតរូបនេះ នៅឯណានោះទេ ហើយបញ្ហាជនសង្ស័យ រួមទាំងវត្ថុតាង និងសម្ភារ កំពុងបំពេញសំណំុបែបបទបញ្ជូនទៅការិយាល័យជំនាញនៃស្នងការដ្ឋាននគរបាល ដើម្បីចាត់ការបន្តតាមនីតិវិធី ៕ ប៉ឹម ពិន
