សារព័ត៌មាន នគរវត្ត តែងតែនាំមុខគេជានិច្ច
លោក អាន់វ៉ា អីប្រាហ៊ីម បានទទួលការហៅទូរស័ព្ទពីប្រធានាធិបតីសហរដ្ឋអាមេរិក លោក Donald Trump ដើម្បីពិភាក្សាអំពីជម្លោះកម្ពុជា-ថៃ ផ្ទុះឡើងជាថ្មីដែលមានរយៈពេល ៥ថ្ងៃមកហើយ។
នៅយប់ថ្ងៃទី១២ ខែធ្នូនេះលើតាមរយៈបណ្តាញសង្គមផ្ទាល់ខ្លួន នាយករដ្ឋមន្រ្តីម៉ាឡេស៊ីលោក អាន់វ៉ា បានប្រាប់លោក Trump អំពីភាពតានតឹងនៅព្រំដែនកម្ពុជា-ថៃ ដោយពន្យល់ពីតួនាទីរបស់ម៉ាឡេស៊ី ក្នុងការជំរុញប្រទេសទាំងពីរឱ្យបញ្ឈប់ការបាញ់គ្នា ហើយត្រឡប់ទៅតុចរចាវិញ តាមរយៈកិច្ចសន្ទនា ក៏ដូចជាយន្តការទ្វេភាគី និងអាស៊ាន។
លោកថា ម៉ាឡេស៊ីនៅតែត្រៀមខ្លួនជាស្រេចដើម្បីជួយដល់កិច្ចខិតខំប្រឹងប្រែងដើម្បីសម្រាលស្ថានការណ៍ និងស្ដារស្ថិរភាពក្នុងតំបន់ ស្របតាមស្មារតីនៃអ្នកជិតខាងល្អរបស់អាស៊ាន។
ក្នុងនាមជាប្រធានអាស៊ាន ម៉ាឡេស៊ីនឹងរៀបចំកិច្ចប្រជុំពិសេសនៃរដ្ឋមន្ត្រីការបរទេសអាស៊ាននៅពេលខាងមុខ ដើម្បីវាយតម្លៃស្ថានការណ៍ និងគាំទ្រវិធានការបន្ធូរបន្ថយការកើនឡើងកម្តៅ។
លោក អាន់វ៉ា ក៏មិនបំភ្លេចថ្លែងអំណរគុណផងដែរចំពោះការចូលរួមយ៉ាងសកម្មរបស់សហរដ្ឋអាមេរិកជាមួយអាស៊ាន និងទំនុកចិត្តដែលបានផ្តល់ឱ្យម៉ាឡេស៊ីក្នុងនាមជាប្រធានអាស៊ានឆ្នាំ២០២៥៕
