សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ព្រោះតែគ្រឿងស្រវឹង បានធ្វើឲ្យនារីម្នាក់បើករថយន្តក្នុងល្បឿនលឿនរួចបត់ចង្កូតមិនទាន់ ក៏ជ្រុលទៅបុកឡើងខឿនស្ពានស្ទឹងមានជ័យ បង្កឲ្យមានការភ្ញាក់ផ្អើលដល់សមត្ថកិច្ច និងប្រជាពលរដ្ឋ ប៉ុន្តែសំណាងល្អគ្រាន់តែរងការខូចខាតរថយន្តទៅមុខលែងរួចនិងមិនបង្កគ្រោះថ្នាក់ដល់អ្នកដ៏ទៃនោះទេ។
ករណីគ្រោះថ្នាក់ចរាចរបង្កឡើងដោយសារអ្នកបើកបរពិសាគ្រឿងស្រវឹងខាងលើនេះ បានកើតឡើងនៅវេលាម៉ោង៨និង៣០នាទីយប់ថ្ងៃទី១០ ខែតុលា ឆ្នាំ២០១៦ នៅចំណុចក្រោមស្ពានស្ទឹងមានជ័យ តាមបណ្ដោយផ្លូវលេខ២៧១ សង្កាត់បឹងសាឡាង ខណ្ឌទួលគោក ។
រថយន្តបង្ក HiGHLADER ពណ៌ទឹកប្រាក់ ពាក់ស្លាកលេខ ភ្នំពេញ.2W-9604 បើកបរដោយស្រ្តីម្នាក់ មិនស្គាល់ឈ្មោះ វ័យប្រហែល២០ជាង ។
តាមប្រភពព័ត៌មានពីសាក្សីនៅកន្លែងកើតហេតុ បានឲ្យដឹងថា មុនពេលកើតគេឃើញរថយន្តបង្កហេតុម៉ាក់ HiGHLADER ពណ៌ទឹកប្រាក់ បើកបរដោយនារីវ័យក្មេងម្នាក់ ក្នុងសមត្ថភាពស្រវឹងជោកជាំ តាមបណ្ដោយផ្លូវលេខ២៧១ ក្នុងទិសដៅពីត្បូងទៅជើង ក្នុងល្បឿនលឿន លុះបើកមកដល់ចំណុចហេតុខាងលើ បានរេចង្កូតទៅបុកខឿនពេញទាំងកំរោល បណ្តាលឲ្យរថយន្តរងការខូតខាតទៅមុខលែងរួច ។ បន្ទាប់ពីនារីបង្កហេតុ បានបើករថយន្តបុករួចហើយរូបនាងបានដេកលក់ក្នុងរថយន្ត ធ្វើព្រងើយដូចជាគ្មានរឿងអ្វីកើតឡើងនោះទេ ។
ក្រោយកើតហេតុ សមត្ថកិច្ចមូលដ្ឋានបានសហការជាមួយសមត្ថកិច្ចជំនាញចុះវាស់វែង រួចស្ទួចយករថយន្តបង្ក និងម្ចាស់ទៅការិយាល័យចរាចរណ៍ផ្លូវគោកក្រុងរង់ចាំដោះស្រាយតាមនីតិវិធី ៕ស ដារ៉ា
