សារព័ត៌មាន នគរវត្ត តែងតែនាំមុខគេជានិច្ច
កម្ពុជា-ឡាវ៖ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានចូលរួមអបអរសាទរ! បន្តិចទៀត យើងនឹងអាចនាំចេញកសិផលទៅចិនឆ្លងកាត់ទឹកដីឡាវតាមផ្លូវគោកបានហើយ! 👏🌾🥬👨🌾👨🌾🇰🇭។
យោងតាមក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា កិច្ចព្រមព្រៀងស្តីពីការដឹកជញ្ជូនកសិផលឆ្លងកាត់(Transit) ដែលទើបចុះហត្ថលេខានៅចំពោះមុខរដ្ឋមន្ត្រីកសិកម្មឡាវនិងកម្ពុជា កាលពីព្រឹកថ្ងៃទី២៥ ខែមករា ឆ្នាំ២០២៦ នឹងបើកផ្លូវឱ្យកម្ពុជាអាចដឹកជញ្ជូនកសិផលទៅកាន់ទីផ្សារប្រទេសចិនតាមផ្លូវគោក ដោយឆ្លងកាត់ទឹកដីឡាវជាផ្លូវការក្នុងពេលដ៏ឆាប់ខាងមុខនេះ។
នេះគឺជាសមិទ្ធផលថ្មីមួយក្នុងការបង្កើនការតភ្ជាប់ក្នុងតំបន់ ដែលកើតចេញពីកិច្ចសហប្រតិបត្តិការយ៉ាងជិតស្និទ្ធរវាងក្រសួងកសិកម្មនៃប្រទេសទាំង២។
ជាមួយគ្នានោះ នារសៀលថ្ងៃទី២៥ ខែមករាដដែរ លោក ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានបន្តអញ្ជេីញនាំលោកបណ្ឌិត Linkham DOUANGSAVANH រដ្ឋមន្រ្តីក្រសួងកសិកម្មនិងបរិស្ថាន នៃសាធារណរដ្ឋប្រជាធិបតេយ្យប្រជាមានិតឡាវ ធ្វេីដំណេីរទស្សនកិច្ច នៅរោងចក្រហ្គោលដេនរ៉ាយស៍(Golden Rice) ខេមបូឌា ខូអិលធីឌី ស្ថិតនៅខេត្តកំពង់ស្ពឺ។
ក្នុងការចុះពិនិត្យនេះដែរ លោករដ្ឋមន្រ្តីទាំងពីររូប បានអញ្ជេីញចុះពិនិត្យពីការកែច្នៃស្រូវអង្ករ ចាត់តាំងពីដំណាក់កាលដំបូង សម្ងួត កិន ការគ្រប់គ្រងគុណភាព វេចខ្ចប់ជាផលិតផលសម្រេច សម្រាប់ដាក់លក់ក្នុងស្រុក និងនាំចេញទៅក្រៅប្រទេស ប្រកបដោយគុណភាព ស្តង់ដាអនាម័យ និងសុវត្ថិភាពខ្ពស់៕ដោយ៖តារា
