សារព័ត៌មាន នគរវត្ត តែងតែនាំមុខគេជានិច្ច
ភំ្នពេញ៖ ជនសង្ស័យម្នាក់ ក្នុងចំណោមពីរនាក់ត្រូវបានកម្លាំងនគរបាលប៉ុស្តិ៍ឫស្សីកែវ ឃាត់ខ្លួនក្នុងករណីលួចម៉ូតូបានសម្រេច តែរត់មិនរួចពីសមត្ថកិច្ច ។
ករណីខាងលើនេះបានកើតឡើងកាលពីវេលាម៉ោង៣និង១០នាទី១២ ខែតុលា ឆ្នាំ២០១៦ ស្ថិតនៅចំណុចផ្លូវបេតុង ក្រុមទី៦ ភូមិមិត្តភាព សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ ។
សមត្ថកិច្ចឲ្យដឹងថា ជនសង្ស័យឈ្មោះវ៉ា សុវណ្ណធី ភេទប្រុស អាយុ១៨ឆ្នាំ មុខរបរសិស្ស ស្នាក់នៅក្នុងសង្កាត់ឫស្សីកែវ ។ ចំណែកគូកនរត់គេចខ្លួនឈ្មោះ វុធ ភេទប្រុស អាយុប្រហែល៣០ឆ្នាំ ។
ជនរងគ្រោះជាម្ចាស់ម៉ូតូមានឈ្មោះ ប៊ុន ធឿនអរុណរតនះ ភេទប្រុស អាយុ២៣ឆ្នាំ ជាបុគ្គលិកក្រុមហ៊ុនស្នាក់នៅផ្ទះលេខ៨៤២ ផ្លូវលំ ក្រុម៦ ភូមិមិត្តភាពសង្កាត់ឫស្សីកែវ ខណ្ឌឫស្សីកែវ ។ ម៉ូតូដែលសមត្ថកិច្ចដកហូតពីជនសង្ស័យ ម៉ាកហុងដា ឃ្លិក ពណ៌ខ្មៅ សេរី២០១៣ ពាក់ស្លាលេខ ភ្នំពេញ ១BC-៨០៣៧ ។
លោកតូច គឹមសុង នាយប៉ុស្តិ៍ឫស្សីកែវ បានឱ្យដឹងថា មុនកើតហេតុជនរងគ្រោះ បានជិះម៉ូតូចេញពីកន្លែងធ្វើការ សំដៅមកផ្ទះ។ ខណៈដល់ផ្ទះឈប់ម៉ូតូរួចក៏ដើរទៅខាងក្នុងដោយភ្លេចដកកូនសោ ឃើញបែបនេះ ជនសង្ស័យក៏ឡើងជិះចេញបានបន្តិច ជនរងគ្រោះឃើញស្រែកចោរៗៗផ្អើលឈុលគាប់ជួនកម្លាំងល្បាត់ប្រទះឃើញជនសង្ស័យ បើកម៉ូតូដេញចាប់បានម្នាក់តែម្តង ៕ អរុណរះ
