🔥អគ្គិភ័យនៅរោងចក្រចម្រាញ់ប្រេង Olmeca ក្នុងប្រទេសម៉ិចស៊ីកូ សម្លាប់មនុស្ស ៥ នាក់

អគ្គិភ័យនៅរោងចក្រចម្រាញ់ប្រេង Olmeca ក្នុងតំបន់ Dos Bocas (ទីក្រុង Paraíso រដ្ឋ Tabasco) បានសម្លាប់មនុស្សយ៉ាងហោចណាស់ ៥ នាក់ រួមទាំងបុគ្គលិកស្ត្រីម្នាក់របស់ក្រុមហ៊ុនផងដែរ។
នៅថ្ងៃទី ១៧ ខែមីនា ក្រុមហ៊ុនប្រេងជាតិម៉ិចស៊ិក (Pemex) បានប្រកាសថា អគ្គិភ័យត្រូវបានរកឃើញនៅម៉ោងប្រហែល ៦ ព្រឹក នៅក្នុងតំបន់ខាងក្រៅរោងចក្រចម្រាញ់ប្រេង Olmeca។
យោងតាមការស៊ើបអង្កេតដំបូង ភ្លៀងធ្លាក់ខ្លាំងបានបណ្តាលឱ្យទឹកលាយជាមួយប្រេងហៀរចេញ និងកកកុញ ដែលនាំឱ្យមានអគ្គិភ័យ។ កងកម្លាំងជួយសង្គ្រោះបានគ្រប់គ្រងអគ្គិភ័យយ៉ាងឆាប់រហ័សក្នុងរយៈពេលប៉ុន្មានម៉ោង។ អគ្គិភ័យបានបំផ្លាញយានយន្តជាច្រើនគ្រឿង និងបណ្តាលឱ្យមានការបំពុលក្នុងតំបន់ជុំវិញដោយសារតែផ្សែងក្រាស់រាលដាល។
រោងចក្រចម្រាញ់ប្រេង Olmeca គឺជាគម្រោងថាមពលសំខាន់មួយដែលបានអនុវត្តក្រោមការដឹកនាំរបស់អតីតប្រធានាធិបតី Andrés Manuel LópezObrador(២០១៨-២០២៤)។ រោងចក្រនេះត្រូវបានគ្រោងនឹងចាប់ផ្តើមប្រតិបត្តិការជាផ្លូវការនៅឆ្នាំ ២០២៤ ដែលរួមចំណែកដល់ការបង្កើនសមត្ថភាពកែច្នៃប្រេងឆៅនៅក្នុងប្រទេសម៉ិចស៊ិក។
ក្រុមហ៊ុន Pemex បានបញ្ជាក់ថា អគ្គិភ័យនេះមិនបានបង្កការខូចខាតដល់កន្លែងផ្ទុកប្រេង និងឧស្ម័នសំខាន់ៗរបស់ក្រុមហ៊ុននៅក្នុងរដ្ឋ Tabasco ទេ ហើយរោងចក្រនេះនៅតែបន្តដំណើរការធម្មតា។

នាយកដ្ឋានសន្តិសុខរបស់ក្រុមហ៊ុន Pemex កំពុងសហការជាមួយអាជ្ញាធរដើម្បីស៊ើបអង្កេតមូលហេតុនៃឧប្បត្តិហេតុនេះ កំណត់អត្តសញ្ញាណជនរងគ្រោះដែលបានស្លាប់ និងបន្តអនុវត្តវិធានការដើម្បីធានាសុវត្ថិភាពឧស្សាហកម្ម និងការការពារបរិស្ថាន៕ ដោយ៖ ធីរីណា

រូប​ថត៖ gialai