សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យុវជន២នាក់ បានរងរបួសធ្ងន់ ដោយសារតែជិះម៉ូតូប៉ះដៃចង្កូតនឹងដើមអំពិល ហើយដួលបោកបង្គោលភ្លើង ព្រោះតែរត់គេចពីក្រុមក្មេងម្ខាងទៀត មានគ្នា២នាក់ដូចគ្នា ដេញកាប់ បង្កឲ្យមានការភ្ញាក់ផ្អើលកាលពីវេលាម៉ោង៣ទៀបភ្លឺ ថ្ងៃទី ១៧ ខែតុលា ឆ្នាំ២០១៦ តាមបណ្តោយផ្លូវព្រះស៊ីសុវត្ថិ មុខសាលាឧទ្ធរ សង្កាត់ជ័យជំនះ ខណ្ឌដូនពេញ រាជធានីភ្នំពេញ ។
តាមសាក្សីដែលបានឃើញហេតុការណ៍បានឲ្យដឹងថា មុនពេលកើតហេតុ គេឃើញយុវជន២ក្រុម មានគ្នា៤នាក់ ជិះម៉ូតូ២គ្រឿង ម៉ាកហុងដា ឌ្រីម សង់ ស៊េរីឆ្នាំ២០១០ ឡើងសេរីឆ្នាំ២០១៣ ពណ៌ខ្មៅ ពាក់ស្លាកលេខ ភ្នំពេញ ១AU-០៣២៣ និងមួយគ្រឿងទៀតម៉ាកស៊ុយស៊ូគីស្មាស់ មិនចាំស្លាកលេខ ជិះដេញកាប់គ្នាតាមបណ្តោយផ្លវព្រះស៊ីសុវត្ថិ ក្នុងទឹសដៅពីជើងទៅត្បូង ។ ពេលជិះដេញគ្នាមកដល់កន្លែងកើតហេតុ យុវជន២នាក់ដែលជិះម៉ូតូឌ្រីមសង់ បានប៉ះដៃចង្កូតនឹងដើមអំពិលទឹក បណ្តាលឲ្យដួលទាំង២នាក់របួសធ្ងន់ អ្នកឌុបរបួសបាក់ភ្លៅខាងឆ្វេង និងអ្នកជិះពីក្រោយសន្លប់ ចំណែកមួយក្រុមទៀត ដែលជិះដេញពីក្រោយបានគេចខ្លួនបាត់ស្រមោល ។ តែបើតាមជនរងគ្រោះវិញ បានឲ្យដឹងថា មុនពេលកើតហេតុ រូបគេទាំង២នាក់ ទើបចេញមកពីក្លឹបកំសាន្ត ហើយជិះម៉ូតូឌុបគ្នាបំណងទៅផ្ទះ ។ ពេលជិះមកដល់មុខព្រះបរមរាជវាំង ក៏មានម៉ូតូមួយគ្រឿងទៀតជិះតាមពីក្រោយប្រដាប់ដោយដាវសាម៉ូរ៉ៃហៅឲ្យពួកគេឈប់ ។ គ្រាន់តែឃើញគេមានដាវ យុវជនរងគ្រោះបានបន្ថែមល្បឿនបំណងជិះគេច តែដោយសារពួកគេស្លន់ ទើបជិះម៉ូតូទៅប៉ះដើមអំពិលបណ្តាលឲ្យដួលរបួសធ្ងន់ទាំង២នាក់ទៅ ។
ក្រោយពេលកើតហេតុ ជនរងគ្រោះត្រូវបានរថយន្តសង្គ្រោះដឹកយកទៅព្យាបាលនៅក្លីនិចឯកជន ចំណែកម៉ូតូត្រូវបានសមត្ថកិច្ចប្រគល់ឲ្យទៅក្រុមគ្រួសារជនរងគ្រោះវិញភ្លាមដែរ ៕ ព្រែកជ័យ
