សារព័ត៌មាន នគរវត្ត តែងតែនាំមុខគេជានិច្ច
ខេត្តស្ទឹងត្រែង ៖ នារសៀលថ្ងៃទី ០៤ ខែ មេសា ឆ្នាំ២០២៦ លោក ទូច គង្គា អភិបាលរងខេត្តស្ទឹងត្រែង និងជាអនុប្រធានក្រុមការងារចុះជួយមូលដ្ឋានស្រុកបុរីអូរស្វាយសែនជ័យ និង លោកស្រីជាភរិយា បានអញ្ជើញជាអធិបតីក្នុងពិធីបើក«សង្ក្រាន្តបុរីអូរស្វាយសែនជ័យ» ដើម្បីអបអរសាទរពិធីចូលឆ្នាំប្រពៃណីជាតិខ្មែរ ដែលនឹងឈានមកនាពេលប៉ុន្មានថ្ងៃខាងមុន ។
ក្នុងពិធីនេះ ក៏មានការអញ្ជើញចូលរួមជាគណៈអធិបតីដោយ លោកស្រី ឡុង ភិរម្យ រដ្ឋលេខាធិការនៃក្រសួងទេសចរណ៍ និង លោក ផាន់ យុត អភិបាលស្រុកនិងភរិយា ព្រមទាំងមានការចូលរួមដោយ លោក លោកស្រី ដែលជាថ្នាក់ដឹកនាំមន្ទីរអង្គភាពជុំវិញខេត្ត កងកម្លាំង មន្រ្តីរាជការលោកគ្រូ អ្នកគ្រូ និងប្រជាពលរដ្ឋជាច្រើននាក់ ។
ការរៀបចំព្រឹត្តិការណ៍នេះឡើង «សង្ក្រាន្តបុរីអូរស្វាយសែនជ័យ» គឺមានគោលបំណងថែរក្សាប្រពៃណី ទំនៀមទម្លាប់ដ៏ល្អផូរផង់របស់ខ្មែរយើង ក៏ដូចជាដើម្បីស្វាគមន៍អបអរសាទរទេវតាឆ្នាំថ្មីដែលនឹងយាងមកគ្រង អភិបាលរក្សាមនុស្សលោកក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី អដ្ឋស័ក ព.ស.២៥៧០ ដែលនឹងឈានចូលមកដល់នាពេលខាងមុខនេះ។
លោកអភិបាលរងខេត្តក៏សូមអំពាវនាវបងប្អូនប្រជាពលរដ្ឋទាំងអស់ សូមចូលរួមលេងកម្សាន្ត «សង្ក្រាន្តបុរីអូរស្វាយសែនជ័យ» ឲ្យបានច្រើនកុះករ ដែលប្រព្រឹត្តធ្វើឡើងក្នុងរយៈពេល ០២ថ្ងៃ ចាប់ពីថ្ងៃទី ០៤-០៥ ខែមេសា ឆ្នាំ២០២៦ ។
គួរបញ្ជាក់ថា ព្រឹត្តិការណ៍ «សង្ក្រាន្តបុរីអូរស្វាយសែនជ័យ» ក៏មានរៀបចំកិច្ចបវេណីសាសនា ការលេងល្បែងប្រជាប្រិយខ្មែរ ការប្រគំតន្ត្រីសម័យ-បុរាណ ដើម្បីរាំកម្សាន្តតាមប្រពៃណីខ្មែរ រួមជាមួយនឹងពិធីហែសង្ក្រាន្ត / ឆៃយុាំ / របាំត្រុដិ / ហែខ្សែ
ព្រ័ត្រ/របាំត្រុដិ /កម្មវិធីរាំកម្សាន្ត /ល្បែងលោតការុងប្រណាំងគ្នា២ក្រុម (ក្រុមសិស្សតូច១ សិស្សធំ១) /ល្បែងបូមទឹកដាក់ដប២ក្រុម (ក្រុមសិស្សតូច១ និងសិស្សធំ១)/ល្បែងដណ្តើមស្លឹកឈើ (រៀបចំជា២ក្រុម បុរស និងនារី) /ល្បែងប្រណាំងកង់យឺត (ផ្នែកកុមារា/យុវជន) /ល្បែងវាយក្អម / ល្បែងទូលក្អម/ល្បែងចោលឈូង /ល្បែងទាញព្រ័ត្រ/ រាំកម្សាន្តទាំងអស់គ្នា ៕
ដោយ ៖ សិលា
