សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំៈ ហេតុការណ៍គ្រោះថ្នាក់ចរាចរណ៍ដ៏រន្ធត់មួយ បានកើតឡើងបណ្តាលឲ្យលោកយាយម្នាក់ស្លាប់នឹងកន្លែងកើតហេតុ ចំណែក ឯលោកតាវិញរបួស បាក់ជើង ត្រូវបានសាច់ញាតិដឹកបញ្ជូនទៅកាន់មន្ទីរពេទ្យ ។
ហេតការណ៍នេះបានកើតឡើងកាលពីវេលាម៉ោង ១១និង៤០នាទីព្រឹក ថ្ងៃទី១៦ ខែតុលា ឆ្នាំ២០១៦ នៅចំណុចមុខវត្តក្រវ៉ា ភូមិក្រវ៉ា ឃុំបាក់ស្នា ស្រុកបារាយណ៍ ខេត្តកំពង់ធំ ។
ប្រភពព័ត៌មានឲ្យដឹងថា នៅមុនពេលកើតហេតុ ជនរងគ្រោះទាំង២នាក់យាយ តា ដែលត្រូវបានគេស្គាល់ឈ្មោះ លឹម រ៉ូន អាយុ៦០ និងលោកតាឈ្មោះ ប្រាក់ រិទ្ធ អាយុ ៥៨ឆ្នាំ រស់នៅភូមិពង្រលីង ឃុំក្រវ៉ា ឃុំបាក់ស្នា ស្រុកបារាយណ៍ ខេត្តកំពង់ធំ មានកូនចំនួន៤នាក់ បានមកធ្វើបុណ្យនៅវត្តក្រវ៉ា ក្រោយពីបានធ្វើបុណ្យដាក់ទានសព្វគ្រប់ ក៏នាំគ្នាធ្វើដំណើរត្រឡប់មកផ្ទះវិញ ដោយជិះម៉ូតូម៉ាក វេវ ពណ៌ខ្មៅ អត់ស្លាកលេខ លុះចេញពីក្លោងទ្វាវត្តក្រវ៉ា បានបន្ដិច ស្រាប់តែរថយន្តកូរ៉េដឹកដំឡូងមី ក្បាលពណ៌ខៀវ ទ្រុងខៀវ ពាក់ស្លាកលេខ កំពង់ធំ ៣A-១៧៧៤ បានបុកយ៉ាងពេញទំហឹង អូសលោកយាយជាង៥ម៉ែត្របណ្តាលឲ្យស្លាប់នៅក្រោមឡាន ជាមួយនឹងម៉ូតូត្រូវរថយន្តកិនខ្ទេច ជាប់នឹងកង់ឡាន ចំណែកលោកតា ត្រូវបាក់ជើង និងដៃរួមទាំងរាងកាយរបួសធ្ងន់ ។
ក្រោយពីកើតហេតុ តៃកុងរថយន្តឃើញសភាពមិនស្រួល ក៏បានដាក់មេប៉្រុច បាត់ស្រមោល ព្រមទាំង បានបន្សល់រថយន្តនៅកន្លែងកើតហេតុ ទើបពុំបានស្គាល់អត្តសញ្ញាណម្ចាស់រថយន្ដ តែខណៈនេះសមត្ថកិច្ច កំពុងតែដុតដៃដុតជើង ស្រាវជ្រាវរកជនបង្កហេតុមកផ្តន្ទាទោសតាមច្បាប់ ។
ក្រោយពីកើតហេតុ សមត្ថកិច្ចប៉ូលិសចរាចរណ៍ បានធ្វើកំណត់ហេតុ រួចបានប្រគល់សាកសពជូនសាច់ញាតិ ទទួលយកទៅធ្វើបុណ្យតាមប្រពៃណី ចំណែកម៉ូតូខូចខាតទាំងស្រុង ។ វត្ថុតាងម៉ូតូ និងរថយន្ត ត្រូវបានសមត្ថកិច្ច យកមករក្សាទុកនៅអធិការស្រុកបារាយណ៍ ដើម្បីរង់ចាំភាគីទាំងសងខាងចូលមកដោះស្រាយតាមនីតិវិធីច្បាប់ ៕ ប៊ុនរិទ្ធី
