បុរសម្នាក់ស្រវឹងស្រាបើករថយន្តលឿនបុករះបណ្តាលឱ្យស្រ្តីជាអ្នកលក់ដូរលើចិញ្ចើមផ្លូវផ្សារដើមគ ស្លាប់យ៉ាងអាណោចអាធ័ម

ភ្នំពេញ ៖ ស្រ្តីម្នាក់ជាអ្នកលក់ដូរលើចិញ្ចើមផ្លូវផ្សារដើមគ បានស្លាប់យ៉ាងអាណោចអាធ័មភ្លាមៗនៅនឹងកន្លែងកើតហេតុ ដោយសារតែបុរសម្នាក់ស្រវឹងស្រាជោកជាំ បានបើករថយន្តនីសាន់ក្នុងល្បឿនលឿនបុករះ កាលពីវេលាម៉ោង២និង១០នាទី រំលងអាធ្រាត្រ ឈានចូលថ្ងៃទី២០ ខែតុលា ឆ្នាំ២០១៦ នៅចំណុចផ្សារដើមគ តាមបណ្តោយផ្លូវព្រះមុនីរ៉េត សង្កាត់ផ្សារដើមគ ខណ្ឌទួលគោក ។

បុរសបើករថយន្តបង្កឈ្មោះសឿន ស៊ីម៉ា អាយុ៣១ឆ្នាំ មុខរបរលក់ដូរ ស្នាក់នៅផ្ទះលេខ៣៨៦ ផ្លវលំភូមិអូបែកក្អម សង្កាត់ទឹកថ្លា ខណ្ឌសែនសុខ ។ សពស្ត្រីរងគ្រោះ អាយុប្រហែល៥៣ឆ្នាំ មុខរបរលក់បនែ្លស្នាក់នៅភូមិកោះថ្មី ស្រុកកោះធំ ខេត្តកណ្តាល ។

ប្រភពពត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេបានឃើញរថយន្តនីសាន់ ពាក់ស្លាកលេខ ភ្នំពេញ ២AF-៩៤៨២ បើកតាមបណ្តោយផ្លូវព្រះមុនីរ៉េត ទិសដៅពីកើតទៅលិច ហើយរថយន្តរេពេញផ្លូវដោយម្ចាស់ទំនងជាស្រវឹងស្រា ពេលមកដល់ចំណុចកើតហេតុបានបុករះឥវ៉ាន់ បន្លែដែលដាក់លក់លើចិញ្ចើមផ្លូវ ហើយជ្រុលទៅបុកនិងកិនស្រ្តីម្នាក់ដែលកំពុងអង្គុយលក់ បណ្តាលឱ្យស្លាប់ភ្លាមៗយ៉ាងអាណោចអាធម៌នៅនឹងកន្លែងកើតហេតុ ។

ប្រភពបន្តថា បន្ទាប់ពីកើតហេតុជនបង្កមិនបានចុះពីលើរថយន្តនោះទេ ហើយមានស្ថានភាពស្រវឹងស្រាជោគជាំថែមទៀតផង ដោយប្រជាពលរដ្ឋខឹងខ្លាំងពេកទប់កំហឹងមិនបាន ក៏បានវាយម្នាក់មួយដៃមួយជើងបែកមុខមាត់ ។

ក្រោយមកសមត្ថកិច្ចមូលដ្ឋានបាននាំខ្លួនជនបង្កចេញពីកន្លែងកើតហេតុទៅអធិការដ្ឋាននគរបាលខណ្ឌទួលគោកដើម្បីកសាងសំណុំរឿង និងបានវាស់វែងយករថយន្តទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញរង់ចាំដោះស្រាយបន្ត ចំណែកសពស្រ្តីរងគ្រោះសមត្ថកិច្ច ទំនាក់ទំនងទៅក្រុមគ្រួសារឱ្យមកទទួលយកទៅធ្វើបុណ្យតាមប្រពៃណី ៕ សុខាសែនជ័យ