សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោក ឃួង ស្រេង អភិបាលរាជធានីភ្នំពេញ បានណែនាំឱ្យក្មួយៗ ដែលជានិស្សិតជ័យលាភីអាហារូបករណ៍រដ្ឋាភិបាល នៃប្រទេសហុងគ្រី ត្រូវចេះគៀងគរ ទាក់ទាញឱ្យនិស្សិតក៏ដូចជាមិត្តភក្កិបរទេស មកទេសចរណ៍ស្រុកខ្មែរឱ្យបានច្រើន។
លោក ឃួង ស្រេង បានណែនាំបែបនេះ ខណៈ លោក ទទួលជួបសំណេះសំណាល ជាមួយក្រុមនិស្សិតជ័យលាភីអាហារូបករណ៍រដ្ឋាភិបាល នៃប្រទេសហុងគ្រីចំនួន២៣រូប កាលពីរសៀលថ្ងៃទី១៨ ខែសីហា ឆ្នាំ២០២៦ នៅសាលារាជធានីភ្នំពេញ។
លោក ឃួង ស្រេង បានបញ្ជាក់ថា៖ ក្មួយៗនិស្សិតដែលបានប្រឡងជាប់អាហារូបករណ៍ទៅសិក្សារៀនសូត្រនៅប្រទេសហុងគ្រី ត្រូវសិក្សារៀនសូត្រឱ្យកាន់តែពូកែថែមទៀត ដើម្បីយកចំណេះវិជ្ជាទាំងនោះ មកអភិវឌ្ឍប្រទេសកម្ពុជាយើងឱ្យរីកចម្រើនជឿនលឿនក្លាយជាប្រទេសមានចំណូលខ្ពស់នៅឆ្នាំ២០៥០។ ការប្រឡងជាប់ជានិស្សិតអាហារូបករណ៍របស់ក្មួយៗ គឺជាមោទនភាពរបស់កម្ពុជាយើង ហើយក៏ជាការបង្ហាញឱ្យឃើញពីខួរក្បាលដ៏វ័យឆ្លាតរបស់កូនខ្មែរ មិនចាញ់និស្សិតបរទេសនៅលើពិភពលោកឡើយ។ ក្រោយពីប្រទេសជាតិមានសន្តិភាពពេញលេញ នៅថ្ងៃទី ២៩ធ្នូឆ្នាំ១៩៩៨ ការបណ្តុះបណ្តាលធនធានមនុស្សនៅកម្ពុជាពិតជាមានសក្តានុពល។ ជាក់ស្តែងពីមួយឆ្នាំទៅមួយឆ្នាំ សិស្សានុសិស្សដែលប្រឡងបាក់ឌុប ទទួលបាននិទ្ទេសAកាន់តែច្រើនៗឡើង។ ការសិក្សារៀនសូត្រមិនមែនបញ្ចប់ត្រឹមការសិក្សានៅតាមសាលារៀនប៉ុណ្ណោះទេ ពោលគឺត្រូវរៀនឱ្យទាន់បច្ចេកវិជ្ជា រៀនសូត្រជារៀងរហូត ដើម្បីដណ្តើមបានទីផ្សារការងារនៅលើពិភពលោក។
សូមក្មួយៗជានិស្សិតទាំងអស់ ដែលត្រូវទៅសិក្សារៀនសូត្រនៅប្រទេសហុងគ្រីត្រូវប្រកាន់ខ្ជាប់នូវប្រពៃណី ទំនៀមទម្លាប់ របស់កម្ពុជាពិសេស សាមគ្គីភាពគ្នាឱ្យបានល្អ។ ធ្វើទំនាក់ទំនងឱ្យល្អជាមួយនឹងនិស្សិតបរទេស បង្ហាញពីវប្បធម៌ប្រពៃណី អត្តសញ្ញាណជាតិរបស់កម្ពុជានិងធ្វើយ៉ាងណា ទាក់ទាញឱ្យមិត្តបរទេស ចាប់អារម្មណ៍ ចង់មកទេសចរណ៍នៅប្រទេសកម្ពុជាយើង។ លោក ឃួង ស្រេង ក៏បាននាំយកអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ជាការលើកទឹកចិត្តដល់និស្សិតទាំង២៣នាក់នេះផងដែរ ៕
ដោយ៖សំរិត
