សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ៖ ស្ពានថ្មថ្មីមួយខ្សែដែលជាអំណោយដ៏ថ្លៃថ្លារបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ត្រូវបានសាងសង់រួចរាល់ និងត្រៀមប្រគល់ជូនប្រជាពលរដ្ឋប្រើប្រាស់ ដើម្បីសម្រួលដល់ការធ្វើដំណើរ ឆ្លងកាត់ស្ទឹងស្ទោង ក្នុងភូមិអូរដូង ឃុំម្សាក្រង ស្រុកស្ទោង ខេត្តកំពង់ធំ។ នេះជាសមិទ្ធផលដ៏សំខាន់មួយដែលបាននាំមកនូវក្ដីសប្បាយរីករាយយ៉ាងក្រៃលែងដល់ប្រជាពលរដ្ឋក្នុងមូលដ្ឋាន។
នាឱកាសចុះពិនិត្យមើលវឌ្ឍនភាពនៃការសាងសង់ស្ពានថ្មថ្មីនេះ ដែលជាចំណងដៃមិនអាចកាត់ថ្លៃបានរបស់សម្ដេចធិបតី នៅថ្ងៃទី២៩ ខែកញ្ញា ឆ្នាំ២០២៦ លោក សាយ គឹមឡម អភិបាលស្រុកស្ទោង បានសង្កត់ធ្ងន់ថា ក្រោមការចង្អុលបង្ហាញដ៏ខ្ពង់ខ្ពស់របស់សម្ដេចមហាបវរធិបតី និងការដឹកនាំអនុវត្តផ្ទាល់របស់ឧបនាយករដ្ឋមន្ត្រីប្រចាំការ វង្សី វិស្សុត ប្រធានក្រុមការងារចុះមូលដ្ឋានខេត្តកំពង់ធំ រួមជាមួយកិច្ចសហការខ្ពស់ពីលោក ឆាយ រិទ្ធីសែន រដ្ឋមន្ត្រីក្រសួងអភិវឌ្ឍន៍ជនបទ និងលោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម ព្រមទាំងការយកចិត្តទុកដាក់ខ្ពស់របស់លោក នួន ផារ័ត្ន អភិបាលខេត្តកំពង់ធំ បានធ្វើឱ្យស្ពាននេះលេចចេញជារូបរាងឡើង។
ស្ពានថ្មថ្មីនេះនឹងជំនួសស្ពានឈើចាស់ទ្រុឌទ្រោម ដែលធ្លាប់បានកសាងដោយសហគមន៍និងសប្បុរសជន ក៏ដូចជាធានាសុវត្ថិភាព ឆាប់រហ័ស និងងាយស្រួលជាងមុនសម្រាប់ការធ្វើដំណើររបស់ប្រជាពលរដ្ឋ សិស្សានុសិស្ស និងលោកគ្រូ អ្នកគ្រូ ជាពិសេសនៅរដូវវស្សា។ លើសពីនេះ វានឹងជួយលើកកម្ពស់សេដ្ឋកិច្ចមូលដ្ឋាន ដោយសម្រួលដល់ការដឹកជញ្ជូនកសិផល និងទំនិញផ្សេងៗ។ ស្ពានថ្មីនេះមានទទឹង ៨ម៉ែត្រ បណ្ដោយ ៦០ម៉ែត្រ និងមានជើងទេផ្លូវបេតុងសងខាងប្រវែង ១៥០ម៉ែត្រ។
អភិបាលស្រុករូបនេះ បានថ្លែងអំណរគុណយ៉ាងជ្រាលជ្រៅដល់ក្រុមការងារបច្ចេកទេស និងវិស្វករ ដែលបានខិតខំប្រឹងប្រែងសាងសង់ស្ពាននេះបានយ៉ាងឆាប់រហ័សតាមការគ្រោងទុក។ លោកក៏បានអំពាវនាវដល់ប្រជាពលរដ្ឋក្នុងមូលដ្ឋានទាំងអស់ ចូលរួមថែរក្សាសមិទ្ធផលដ៏មានតម្លៃនេះឱ្យបានគង់វង្ស និងប្រើប្រាស់បានយូរអង្វែង ដើម្បីជាប្រយោជន៍រួមសម្រាប់សហគមន៍ទាំងមូល៕
ដោយ៖ តារា
