រថយន្ត២គ្រឿងបុកគ្នានៅខេត្តពោធិ៍សាត់រងរបួសធ្ងន់ ស្រាល១៨នាក់

ខេត្តពោធិ៍សាត់៖ រថយន្ត២គ្រឿងបានបុកគ្នាពេញទំហឹង បណ្តាលឲ្យមនុស្សយ៉ាងតិច១៨នាក់រងរបួសធ្ងន់ ស្រាល ។

ហេតុការណ៍នេះបានកើតឡើងកាលពីវេលាម៉ោង១៤និង៤០នាទី ថ្ងៃទី៥ ខែវិច្ឆិកា ឆ្នាំ២០១៦ ស្ថិតនៅតាមបណ្តោយផ្លូវជាតិ៥ ត្រង់ចំណុចបង្គោលគីឡូម៉ែត្រលេខ១៦៦ នឹងលេខ១៧៧ ភូមិតាកែវលើ ឃុំត្នោតជុំ ស្រុកក្រគរ ខេត្តពោធិ៍សាត់ ។

សាក្សីឃើញហេតុការណ៍បញ្ជាក់ថា នៅមុនពេលកើតហេតុ រថយន្តបង្ក ម៉ាកកៀរ ពាក់ស្លាកលេខ ផ ០៣៥៩ ភព ២ ធ្វើដំណើរពីកើតទៅលិច លុះដល់ចំណុចកើតហេតុខាងលើ បានបុកជាមួយរថយន្តម៉ាក សាំយ៉ុង ពណ៌ស ពាក់ស្លាកលេខ ភ្នំពេញ 2u 6594 ដែលបើកបរបញ្ច្រាសទិសគ្នា បណ្តាលឲ្យមនុស្សរងរបួស១៨នាក់ ក្នុងនោះរងរបួសធ្ងន់៩នាក់ ។

រថយន្តសង្គ្រោះបន្ទាន់៣គ្រឿងបានទៅដឹកជនរងគ្រោះស្រី ប្រុស ក្មេង ចាស់ ទាំងអស់នោះទៅកាន់មន្ទីរពេទ្យបង្អែកខេត្តពោធិ៍សាត់ ៕ ប៉ឹម ពិន