សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មនុស្សប្រុសស្រី៣នាក់ ត្រូវសមត្ថកិច្ចខណ្ឌសែនសុខឃាត់ខ្លួនករណីទទួលផលចោរកម្ម និងករណីលួច ។
ការឃាត់ខ្លួននេះ ធ្វើឡើងកាលពីវេលាម៉ោង១និង០០នាទីរសៀល ថ្ងៃទី២៨ ខែវិច្ឆិកា ឆ្នាំ២០១៦ នៅចំណុចផ្ទះ១៨១ ភូមិក្រាំងអង្រ្កង សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។
ជនសង្ស័យដែលឃាត់ខ្លួនទាំង៣នាក់នោះទី១មានឈ្មោះ សេត រ៉ានី ភេទស្រី អាយុ២៩ឆ្នាំ មុខរបរនៅផ្ទះ ស្នាក់នៅក្នុងបុរីពិភពថ្មី ភូមិក្រាំងអង្ក្រង សង្កាត់ក្រាំងធ្នង់ និងមានស្រុកកំណើត ភូមិព្រៃស្ពឺ ឃុំព្រៃស្ពឺ ស្រុកចំការលើ ខេត្តកំពង់ចាមទី២ឈ្មោះ អៃ សារ៉ែន ភេទប្រុស អាយុ៣១ឆ្នាំ មុខរបេមិនពិតប្រាកដ ទាំង២នាក់នេះ ត្រូវជាប្តីប្រពន្ធស្នាក់នៅជាមួយគ្នា និងមានស្រុកកំណើតភូមិពាក់បង្អោង ឃុំត្រពាំងធំខាងជើង ស្រុកត្រាំកក់ ខេត្តតាកែវ និងទី៣ ឈ្មោះ កុយ ឡយ ភេទប្រុស អាយុ២៤ឆ្នាំ មុខរបរលក់កង់ឡាន ស្នាក់នៅភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ និងមានស្រុកំណើតភូមិឫស្សីស្រុកខាងកើត ឃុំឫស្សីស្រុក ស្រុកកំពង់ត្រាច ខេត្តកំពត ។ ចំណែកដើមបណ្តឹងមានឈ្មោះ ហៀប ហុន ភេទប្រុស អាយុ៣៤ឆ្នាំស្នាក់នៅផ្ទះលេខ១៤៨ ផ្លូវF ក្នុងបុរីពិភពថ្មី ភូមិក្រាំងអង្ក្រង សង្កាត់ក្រាំងធ្នង់ខណ្ឌសែនសុខ និងមានស្រុកកំណើតភូមិព្រៃបក់ ឃុំទម្លប់ ស្រុកលើកដែក ខេត្តកណ្តាល។
ប្រភពពីជនរងគ្រោះជាដើមបណ្តឹងបានឲ្យដឹងថា កាលពីថ្ងៃទី១១ ខែវិច្ឆិកា ឆ្នាំ២០១៦ រូបគាត់បានទុកយ៉ានរថយន្តចំនួន៤ និងម៉ាសុីនត្រជាក់១គ្រឿង នៅក្នុងផ្ទះរបស់គាត់ជាន់ទី១ ស្រាប់តែបាត់ពុំដឹងអ្នកណាយក រហូតមកដល់ថ្ងៃទី២៦ ខែវិច្ឆិកា ឆ្នាំ២០១៦ រូបគាត់បានបើករថយន្តទៅប៉ះកង់នៅចំណុចផ្ទះជនសង្ស័យឈ្មោះ ឡយ ស្រាប់តែឃើញយ៉ានរថយន្តរបស់ គាត់ពេលនោះគាត់បានសួរទៅឈ្មោះឡយ ថា យ៉ានរថយន្តនេះជារបស់ខ្ញុំ តើឯងបានមកពីណា? ពេលនោះឈ្មោះ ឡយ បានប្រាប់ថា ខ្ញុំទិញពីគេមកដែរ ។ ជនរងគ្រោះ បានសួរទៀតថា ឯងស្គាល់ឈ្មោះ ឫមុខអ្នកយកមកលក់នោះទេ? ឈ្មោះ ឡយ បានប្រាប់ថា ខ្ញុំអត់ស្គាល់ទេ តែខ្ញុំស្គាល់រថយន្តរបស់គេពេលនោះជនរងគ្រោះបានប្រាប់ទៅឈ្មោះឡយថា ចាំជួយសហការផងចឹង។
លុះដល់ថ្ងៃទី២៨ ខែវិច្ឆិកា ឆ្នាំ២០១៦ វេលាម៉ោង១២និង០០នាទី គាត់បានឃើញម៉ាសុីនត្រជាក់របស់គាត់នៅក្នុងផ្ទះលេខ១៨១ ផ្លូវG ក្នុងបុរីពិភថ្មី និងឃើញមានរថយន្ត១គ្រឿងទៀត ម៉ាកាមរីគូទហើម ពណ៌ខ្មៅ ពាក់ស្លាកលេខ កំពង់ចាម 2A.0937 គាត់ក៏ទៅហៅជនសង្ស័យឈ្មោះ ឡយ អោយមកចង្អុលពេលឈ្មោះ ឡយ មកដល់បានប្រាប់ថា ម្ចាស់រថយន្តហ្នឹងហើយ ដែលយកយ៉ានរថយន្តមកលក់អោយខ្ញុំ ពេលនោះគាត់បានរាយការប្រាប់សមត្ថកិច្ចអោយចុះមកទីតាំងខាងលើ ឃាត់ខ្លួនពួកគេទាំង៣នាក់ រួមនិងវត្ថុតាងយកមកអធិការដ្ឋាននគរបាលខណ្ឌសែនសុខសាកសួរតាមនិតិវិធី ៕ តុង សីហា
