សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាលៈ សមត្ថកិច្ចនគរបាលស្រុកស្អាងសហការជាមួយនគរបាលប៉ុស្តិ៍រដ្ឋបាលត្រើយស្លានិងនគរបាលប៉ុស្តិ៍រដ្ឋបាលតាលន់ចេញល្បាតចាប់ខ្លួនបានជនល្មើសជួញដូរគ្រឿងញៀន ៣នាក់ជាបន្តបន្ទាប់ កាលពីថ្ងៃទី២៧ ខែធ្នូ ឆ្នាំ២០១៦ ស្ថិតក្នុងភូមិចុងកោះតូចនិងភូមិតាលន់ ឃុំតាលន់ ស្រុកស្អាង ខេត្តកណ្តាល។
មន្ត្រីនគបាលប្រឆាំងគ្រឿងញៀនស្រុកស្អាងបានឲ្យដឹងថា ជនល្មើសដែលត្រូវបានខ្លួននោះ ទី១-ឈ្មោះ ឡន វ៉ាន់ដា ហៅស៊ុយ ភេទ ប្រុស អាយុ២២ឆ្នាំ ជនជាតិខ្មែរ មុខរបរ មិនពិតប្រាកដ ទីលំនៅភូមិ ទួលក្តី ឃុំត្រើយស្លាស្រុកស្អាង ទី២-ឈ្មោះ វឿន លីថូ ភេទ ប្រុស អាយុ ២៣ឆ្នាំ ជនជាតិខ្មែរ មុខរបរ មិនពិតប្រាកដ ទីលំនៅ ភូមិទួលក្តី ឃុំត្រើយស្លា ស្រុកស្អាង ខេត្តកណ្តាល និងទី៣-ឈ្មោះ អ៊ឺង អ៊ីភេទ ប្រុស អាយុ៥០ឆ្នាំ ជនជាតិខ្មែរ មុខរបរ មិនពិតប្រាកដ ទីលំនៅភូមិតាលន់ ឃុំតាលន់ ស្រុកស្អាង ។
ប្រភពដដែលបានបន្តថា ក្នុងប្រតិបត្តការបង្រ្កាបចាប់ខ្លួនជនល្មើសខាងលើនេះ សមត្ថកិច្ចឆែកឆេរដកហូតបានវត្ថុតាងរួមមាន៖ ថ្នាំញៀនប្រភេទមេតំហ្វេតាមីន ហៅម៉ាទឹកកកចំនួន០៦កញ្ចប់ធំ ,ទូរស័ព្ទដៃ០១គ្រឿង និងម៉ូតូមួួយគ្រឿងម៉ាកហុងដាគុប ធុនសេ៩០ ពណ៌សំបកឪឡឹក ពាក់ស្លាកលេខ កណ្តាល1J 7419 ។
ប្រភពដដែលបានបន្តទៀតថា អនុវត្តតាមការណែនាំរបស់លោកវរសេនីយ៍ឯក សេង សុជាតិ អធិការនគរបាលស្រុក កម្លាំងនគរបាលប្រឆាំងគ្រឿងញៀនស្រុកសហការជាមួយនគរបាលតាមបណ្តាប៉ុស្តិ៍រដ្ឋបាលចេញល្បាតបង្កាទប់ស្កាត់បទល្មើសផ្សេងៗ ជាពិសេសេបទល្មើសគ្រឿងញៀន ។ ជាក់ស្តែងនៅថ្ងៃទី២៧ ខែធ្នូ ឆ្នាំ២០១៦ សមត្ថកិច្ចប្រឆាំងគ្រឿងញៀន សហការជាមួយនគរបាលប៉ុស្តិ៍រដ្ឋបាលត្រើយស្លានិងនគរបាលប៉ុស្តិ៍រដ្ឋបាលតាលន់ចេញល្បាតតាមបណ្តោយផ្លូវជាតិលេខ១១០ត្រើយខាងកើតដងទន្លេបាសាក់ ខណៈល្បាតដល់ចំណុចភូមិចុងកោះតូចក៏បានប្រទះឃើញជនល្មើស២នាក់កំពុងម៉ូតូ ដោយមានការសង្ស័យសមត្ថកិច្ចបានហៅឲ្យឈប់សុំធ្វើការត្រួតពិនិត្យរកឃើញមានវត្ថុតាងថ្នាំញៀនមួយកញ្ចប់ធំនៅជាប់ខ្លួនជនល្មើសក៏ធ្វើការចាប់ខ្លួនយកទៅធ្វើការសាកសួរ ។
ក្រោយពីបានចម្លើយសារភាពរបស់ជនល្មើសទាំង២នាក់នេះ លោក សេង សុជាតិ អធិការនគរបាលស្រុកបានសុំគោលការណ៍ពីលោកឧត្តមសេនីយ៍ទោ អ៊ាវ ចំរើន និងសុំការណ៍ឯកភាពពីលោក លឹម សុគន្ថា ព្រះរាជអាជ្ញាអមសាលាដំបូងខេត្ត បន្តចាប់ខ្លួនជនល្មើសម្នាក់ទៀតនិងឆែកឆេរលំនៅដ្ឋាននៅភូមិតាលន់ ឃុំតាលន់ រកឃើញវត្ថុតាងថ្នាំញៀនចំនួន៥កញ្ចប់បន្ថែមទៀត ដើម្បីកសាងសំណុំរឿងចាត់ការតាមនីតិវិធីច្បាប់ ៕ស្អាងជ័យ
