សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ក្នុងពិធីប្រគល់រ៉ឺម៉កជួលជុលផ្លូវ សំបុកមាន់ ឲ្យទៅមន្ទីររាជធានី-ខេត្ត នៅទូទាំងប្រទេសចំនួន៦៥គ្រឿង នាថ្ងៃ ទី២៩ ខែធ្នូ ឆ្នាំ២០១៦ ម្សិលមិញនេះ ដើម្បី យកទៅជួសជុល ផ្លូវខូចនៅតាមបណ្ដាស្រុកនិងខេត្តនោះ លោកទេសរដ្ឋមន្រ្តីស៊ុន ចាន់ ថុល និងជារដ្ឋមន្រ្តីក្រសួងគមនាគមន៍និងដឹកជញ្ជូនបានស្នើឲ្យប្រជាពលរដ្ឋថតរូបផ្លូវណា ដែលមានសំបុកមាន់ផ្ញើមកក្រសួង ដើម្បីឲ្យក្រសួងបានដឹង ហើយបញ្ជូនអ្នក ជំនាញទៅជួសជុល។
លោកទេសរដ្ឋមន្រី្តក៏បានថ្លែងឲ្យដឹងទៀតថា នៅឆ្នាំ២០១៧ខាងមុខក្រសួងនឹងមានគម្រោងទិញរ៉ឺម៉ក និងរថយន្តសម្រាប់ជួសជុលផ្លូវដែលមានសំបុកមាន់បន្ថែមទៀតប្រហែលជា២០០គ្រឿង ។ ដោយ ឡែកចាប់ពីថ្ងៃទី១ ខែ មករា ឆ្នាំ២០១៧ នេះតទៅមន្រ្តីស្ថិត ក្រោមក្រសួងត្រូវតែ គូសគំនូសផ្លូវមាន សំបុកមាន់ ។ ទាំងអ្នក សារព័ត៌មាន និងប្រជាពលរដ្ឋ បើផ្លូវកន្លែង ណាមានសំបុកមាន់ ហើយអត់មានគំនូស ពណ៌សទេ ត្រូវរាយការណ៍មកក្រសួងដោយថតផ្ញើមកហ្វេសប៊ុករបស់ក្រសួងសាធារណការ ព្រោះយើងខ្ញុំមិនអាចមើលបានរាប់រយម៉ឺនសំបុកមាន់នៅទូទាំងប្រទេសបានទេ ។
លោកស៊ុន ចាន់ថុលអះអាងទៀតថា ចំពោះផ្លូវដែលស្ថិតនៅក្រោម ការគ្រប់ គ្រងរបស់ក្រសួងសាធារណការ គឺក្រសួងមានភារកិច្ចមើលថែទាំផ្លូវ ដែលស្ថិតនៅ ក្រោមការគ្រប់គ្រងរបស់ក្រសួងប៉ុណ្ណោះ ព្រោះគម្រោង ថវិកាទម្លាក់មក គឺបែងចែក ទៅតាមក្រសួង ដាច់ដោយឡែកពីគ្នា ។ ផ្លូវដែលស្ថិតក្រោមការគ្រប់គ្រងរបស់ក្រសួងមានផ្លូវជាតិ និងផ្លូវខេត្ត ចំណែកផ្លូវក្រោមការទទួលខុសត្រូវរបស់ក្រសួងអភិវឌ្ឍន៍ជន បទគឺក្រសួងនេះជាអ្នកចាត់ចែងដោយខ្លួនឯងចុះ ៕ ប្រាថ្នា
