សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាលៈ យុវជនម្នាក់បើកបរម៉ូតូបោះពួយបុកបុរសចំណាស់ម្នាក់កំពុងបត់ម៉ូតូឆ្លងផ្លូវ បណ្តាលឲ្យដួលរងរបួសទាំងសងខាង កាលពីវេលាម៉ោង១៨ និង១០នាទី ថ្ងៃទី១៧ ខែមករា ឆ្នាំ២០១៧ នៅលើកំណាត់ផ្លូវជាតិលេខ២១បេ ស្ថិតនៅក្នុងភូមិព្រែកស្ដី ឃុំព្រែកស្តី ស្រុកកោះធំ ។
មន្ត្រីនគរបាលចរាចរណ៍ស្រុកកោះធំបានឲ្យដឹងថា បុរសចំណាស់ឈ្មោះ ជា ងន ភេទប្រុស អាយុ៥៥ឆ្នាំ ជនជាតិខ្មែរ មុខរបរ កម្មករសំណង់ (រងរបួសធ្ងន់) មានទីលំនៅភូមិកំពង់ស្វាយក្រោម ឃុំព្រែកថ្មី ស្រុកកោះធំ ជាអ្នកបើកបរម៉ូតូម៉ាកស៊ីធី ធុនសេ១០០កូរ៉េ ពណ៌ខ្មៅ គ្មានស្លាកលេខ ។ ចំណែកឯយុវជនខាងលើនេះឈ្មោះ ជី សិលា ភេទប្រុស អាយុ១៨ឆ្នាំ ជនជាតិខ្មែរ មុខរបរ កម្មករ (រងរបួសស្រាល) មានទីលំនៅភូមិព្រែកមេស្រុក ឃុំព្រែកស្ដី ស្រុកកោះធំ ជាអ្នកបើកបរម៉ូតូម៉ាកហុងដាឌ្រីម ធុនសេ១២៥ ពណ៌ប្រផះ ពាក់ស្លាកលេខភ្នំពេញ1GC-0972 ។
ប្រភពដដែលបានបន្តថា នៅមុនពេលកើតហេតុសាក្សីបានឃើញម៉ូតូម៉ាកស៊ីធីបើកបរតាមបណ្តោយផ្លូវជាតិលេខ២១បេក្នុងទិសដៅពីត្បូងទៅជើង ខណៈបើកដល់ចំណុចកើតហេតុបានបត់ឆ្វេងឆ្លងផ្លូវដោយមិនបានស៊ីញ៉ូ ស្របពេលនោះម៉ូតូហុងដាឌ្រីមបើកមកពីក្រោយគេចមិនទាន់ជាន់ហ្វ្រាំងមិនជាប់ក៏បុកពេញមួយទំហឹង បណ្តាលឲ្យម៉ូតូទាំង២គ្រឿងដួលបោកទៅលើផ្លូវធ្វើឲ្យអ្នកបើកបររងរបួសធ្ងន់ស្រាលតែម្តង ។
មន្ត្រីនគរបាលចរាចរណ៍ស្រុកកោះធំបានបញ្ជាក់ថា ករណីនេះបង្កដោយភាគីម៉ូតូម៉ាកស៊ីធីបើកបត់ឆ្វេងឆ្លងផ្លូវខ្វះការប្រុងប្រយ័ត្ន ស្របពេលដែលម៉ូតូហុងដាឌ្រីមបើកបរក្នុងល្បឿនលឿន ទើបគេចមិនទាន់ជាន់ហ្វ្រាំងមិនជាប់ក៏បុកពេញទំហឹងតែម្តង ៕ ស្អាងជ័យ
