សារព័ត៌មាន នគរវត្ត តែងតែនាំមុខគេជានិច្ច
ភ្នំពេញៈ កម្លាំងនគរបាលព្រហ្មទណ្ឌខណ្ឌដូនពេញសហការជាមួយកម្លាំងមូលដ្ឋានប៉ុស្តិ៍ផ្សារចាស់ធ្វើការស្រាវជ្រាវរហូតឈានទៅដល់ការឃាត់ខ្លួនបុរសម្នាក់ ពាក់ព័ន្ធករណីជួញដូរគ្រឿងញៀនជាក់ស្តែងដកហូតវត្ថុតាងបានថ្នាំញៀនចំនួន៣កញ្ចប់តូច ,ជញ្ជីងសម្រាប់ថ្លឹងគ្រឿងញៀន០១,ថង់ចំនួន២ដុំធំសម្រាប់ច្រកគ្រឿងញៀន,លុយខ្មែរចំនួន២មុឺនរៀល,ទូរស័ព្ទដៃខូច២គ្រឿង ។
ករណីឃាត់ខ្លួនការជួញដូរគ្រឿងញៀនខាងលើនេះ បានធ្វើឡើងកាលពីវេលាម៉ោង១១ព្រឹក ថ្ងៃទី១៩ ខែមករា ឆ្នាំ២០១៧ ស្ថិតនៅចំណុចផ្ទះលេខ១៤២ ផ្លូវលេខ១១០ សង្កាត់ផ្សារចាស់ ខណ្ឌដូនពេញ ។
តាមប្រភពព័ត៌មានពីមន្រ្តីនគរបាលព្រហ្មទណ្ឌខណ្ឌដូនពេញ បានឲ្យដឹងថា ជនសង្ស័យដែលត្រូវឃាត់ខ្លួននោះឈ្មោះ សុវណ្ណ មករា ភេទប្រុស អាយុ១៨ឆ្នាំ ស្នាក់នៅទីតាំងផ្ទះឃាត់ខ្លួនខាងលើ ។ ចំណែកឯវត្ថុតាងចាប់យកពីជនសង្ស័យមាន៖ថ្នាំញៀនប្រភេទម៉ាទឹកកកចំនួន៣កញ្ចប់តូច ; រួមមានជញ្ជីងសម្រាប់ថ្លឹងគ្រឿងញៀន០១,ថង់ចំនួន២ដុំធំសម្រាប់ច្រកគ្រឿងញៀន,លុយខ្មែរចំនួន២មុឺនរៀល,ទូរស័ព្ទដៃខូច២គ្រឿង ។
មន្រ្តីដដែល បានបន្តទៀតថា នៅមុនពេលឃាត់ខ្លួនជនសង្ស័យខាងលើនេះ គឺកម្លាំង នគរបាលព្រហ្មទណ្ឌខណ្ឌបានសហការជាមួយកម្លាំងនគរបាលប៉ុស្តិ៍ផ្សារចាស់បាន ជិះល្បាតដើម្បីទប់ស្កាត់បទល្មើសជាក់ស្តែងដែលអាចកើតមានឡើងក្នុងមូលដ្ឋាន លុះជិះមកដល់ចំណុច មុខផ្ទះជនសង្ស័យ ស្រាប់តែប្រទៈឃើញសង្ស័យឈ្មោះសុវណ្ណ មករា កំពុងតែឈររ៉េរា ដើម្បីធ្វើសកម្មភាពលក់ថ្នាំញៀន ដោយមានការសង្ស័យក៏ឃាត់ខ្លួន និងឆែកឆេរកឃើញថ្នាំញៀនចំនួន៣កញ្ចប់តូចជាក់ស្តែងដែលលាក់ទុកក្នុងប្រអប់ដាក់ពិលនិងដកហូតបានសម្ភារះចំនួនទៀតផងដែរ ។
ក្រោយឃាត់ខ្លួនជនសង្ស័យរួមនិងវត្ថុតាងត្រូវបានបញ្ចូនទៅសាកសួរនៅអធិការដ្ឋាននគរបាលខណ្ឌដូនពេញដើម្បីចាត់ការតាមនីតិវិធីច្បាប់ ៕ ស ដារ៉ា
