សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ របាំងថ្មពុះចែកទ្រូង ផ្លូវចំនួន៣កង់ ត្រួវបានរងការខូចខាត ដោយសារតែ រថយន្តម៉ាកRX300 មួយគ្រឿងបានបើកជ្រុល ទៅបុកយ៉ាងពេញទំហឹង បណ្ដោយឲ្យរថយន្តបង្កដាច់កាឡេខាងឆ្វេងទៅមុខលែងរួច កាលពីវេលាម៉ោង២និង២០នាទីរំលងអធ្រាត្រ ឈានចូលថ្ងៃទី២២ ខែមករា ឆ្នាំ២០១៧ នៅតាមបណ្ដោយផ្លូវលេខ២៧១ ស្ថិតក្នុងសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។
តាមសាក្សីនៅកន្លែងកើតហេតុ បានឲ្យដឹងថា មុនពេលកើតហេតុគេ បានឃើញរថយន្ដមួយគ្រឿងម៉ាកRX300 ពណ៌ខ្មៅ ពាក់ស្លាកលេខ ភ្នំពេញ 2H-5916 បើកបរ ដោយបុរសម្នាក់រួមដំណើរជាមួយ មិត្តភក្តិ៣នាក់ទៀត ក្នុងទិសដៅពីជើងទៅត្បូង ក្នុងល្បឿនយ៉ាងលឿនលុះមកដល់ចំណុចកើតហេតុខាងលើរថយន្តសង្ស័យអ្នកបើកបរងងុយដេកមួយភាំង ក៏រេចង្កូត ទៅបុករបាំងថ្មពុះចែកទ្រូងផ្លូវពេញទំហឹង បណ្ដាលឲ្យរងការ ខូចខាតអស់៣កង់ ហើយរថយន្តដាច់កាឡេខាងឆ្វេងទៅមុខលែងរួច ពេលនោះអ្នកបើករថយន្តនិងអ្នកជិះជាមួយបាននាំគ្នារត់គេចខ្លួនបាត់ស្រមោល ទុកតែរថយន្តនៅនឹងកន្លែងកើតហេតុ។
ក្រោយពេលកើតហេតុ សមត្ថកិច្ចបានចុះដល់ ចំណុចកើតហេតុបាន ស្ទូចយករថយន្តបង្កទៅរក្សាទុកនៅការិយាល័យនគរបាលចរាចរណ៍ផ្លូវគោកដើម្បីដោះស្រាយតាមផ្លូវច្បាប់ ៕ ស រស្មី
