សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នារីវ័យក្មេងម្នាក់បានស្លាប់នៅកន្លែងកើតហេតុយ៉ាងអាណោចអាធ័ម និងម្នាក់ទៀតរងរបសធ្ងន់ ខណៈជិះម៉ូតូចេញពីផ្ទះទៅយកប្អូននៅសាលា ហើយត្រូវរថយន្តកូរ៉េបើកបុកពីក្រោយបណ្តាលដួលរួចកិនពីលើ កាលពីវេលាម៉ោង១០និង២០នាទីព្រឹក ថ្ងៃទី១ ខែកុម្ភៈ ឆ្នាំ២០១៧ នៅចំណុចមុខក្រុមហ៊ុនហុងដា តាមបណ្តោយផ្លូវវេងស្រេង ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ។
ជនរងគ្រោះដែលស្លាប់ឈ្មោះរិន សារ៉ារ៉ូឌី ភេទស្រី អាយុ១៧ឆ្នាំ មានស្រុកកំណើតនៅភូមិចោមចៅ សង្កាត់ចោមចៅ ខណ្ឌពោធិ៍សែនជ័យ។ ចំណែកអ្នករបួសនៅមិនទៀនស្គាល់អត្តសញ្ញាណនៅឡើយទេ។
តាមសាក្សីនៅកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញនារី២នាក់ ជិះម៉ូតូមួយគ្រឿងម៉ាក zoomerx ពណ៌ខ្មៅលាយស ពាក់ស្លាកលេខ ភ្នំពេញ FS 9601. ធ្វើដំណើរតាមបណ្តោយផ្លូវវេងស្រេង ក្នុងទិសដៅពីលិចទៅកើត ពីមុខរថយន្តកូរ៉េ ខណៈមកដល់ចំណុចកើតហេតុ រថយន្តបង្កដែលមិនចាំស្លាកលេខ បានបុកពីក្រោយហើយកិនពីលើបណ្តាលឲ្យនារីម្នាក់ស្លាប់នៅកន្លែងកើតហេតុ និងម្នាក់ទៀតរងរបួសធ្ងន់បាក់ជើងម្ខាង។
សាក្សីដដែលបានបន្តថា បន្ទាប់ពីរថយន្តបង្កបានបុករួច ក៏បន្តដំណើរគេចខ្លួនបាត់។
តាមសារៀបរាប់ពីបងប្អូនសពបានឲ្យដឹងថា មុនពេលកើតហេតុជនរងគ្រោះ បានជិះម៉ូតូទៅយកប្អូនពីសាលារៀនតែមិនទៀននិងបានទៅដល់ផងក៏ជួបគ្រោះថ្នាក់បែបនេះតែម្តង។
ក្រោយពេលកើតហេតុសមត្ថកិច្ចបានចុះមកដល់ចំណុចកើតហេតុ និងប្រគល់សពឲ្យក្រុមគ្រួសារ ចំណែកម៉ូតូត្រូវបានសមត្ថកិច្ចយកទៅរក្សារទុកនៅអធិការដ្ឋាននគរបាលខណ្ឌពោធិ៍សែនជ័យរង់ចាំបងប្អូនយកឯកសារពាក់ព័ន្ធមកយកទៅវិញ ៕ សុខាសែនជ័យ
